Այսօրուան դրութեամբ Սուրիոյ Քեսապ աւանէն 22 առեւանգուած հայեր կան, որոնք տարուած էին Թուրքիոյ սահմանին կից նորակառոյց բանտ, իսկ տասնըմէկի ճակատագիրը անյայտ է, բոլորն ալ տարիքով մեծահասակներ են, այս մասին այսօր` լրագրողներու հետ հանդիպման ըսաւ ՍԴՀԿ Հայաստանի կառոյցի փոխատենապետ, սուրիահայ Վազգէն Մեսրոպեան:

Մեսրոպեանի խօսքով` այսօր գիտցած են, որ անոնցմէ երեքը, որոնք շատ ծեր են, ազատ արձակած են, եւ մինչեւ կէսօր անոնք  Լաթաքիա կ’ըլլան: Մնացածի ճակատագիրը դեռ անորոշ է, ոչ մէկ տեղեկութիւն չկայ:
«Մարդիկ, որոնք հապճեպ տուներէն փախած են, թողած են իրենց բջջային հեռախօսները: Ահաբեկիչները վերցնելով հեռախօսները եղած համարներով կը զանգեն անոնց հարազատներուն ու կը սպառնան: Քեսապի բոլոր տուները թալանուած են, եւ այդ տուներուն մէջ եղած իրերը արդէն կը ծախուին Թուրքիոյ մէջ»,- ըսած է Վազգէն Մեսրոպեան:

Մեսրոպեան վստահեցուցած է նաեւ, որ մինչեւ այս պահը Քեսապի մէջ հայ զոհեր չկան. Ահաբեկիչները SMS–հաղորդագրութեան միջոցով յայտարարած են, թէ կան երկու վիրաւոր: «Կը կրկնեմ` ատիկա ահաբեկիչներու հաղորդածն է»,- շեշտեած է Վազգէն Մեսրոպեան:

Վերջինս ըսած է նաեւ, թէ քիչ  մարդիկ մնացած են Լաթաքիոյ Աստուածածին
եկեղեցւոյ մէջ. հիմնական մասը տեղափոխուած է Լաթաքիա ապրող իրենց բարեկամներու տուները:

Սուրիահայ բանախօսը տեղեկացուցած է, որ մէկ շաբաթ է` որ Հալէպը ոչ համացանցայի՛ն, ո՛չ ալ հեռախօսային կապ չունի:

«Մենք պէտք չէ մոռնանք նաեւ Հալէպը: Ճիշդ է, Քեսապը մեզի համար շատ հարազատ վայր է, բայց Հալէպն ալ  ծայրայեղ վիճակի մէջ է: Լրատուամիջոցներուն կը խնդրեմ ու կը յորդորեմ Հալէպին եւս չմոռնալ»,-նշեց ՍԴՀԿ փոխատենապետը` աւելցնելով, թէ ինքը շատ այլ նորութիւններ ալ ունի, բայց ատոնց մասին այսօր յայտարարել չի կրնար` անվտանգութեան նկատառումներէ ելլելով:

«Այս յեղափոխութիւն չէ, սա կարգի փոփոխութեան պահանջ չէ, սա ահաբեկչութիւն է, եւ աշխարհը, ինչպէս միշտ, դիտորդի կարգավիճակի մէջ է այս հարցին»,- իր վրդովումունքը արտայայտած է Վազգէն Մեսրոպեան:

Անդրադառնալով Սուրիա մեկնած հայ պատգամաւորներու խումբին, Վազգէն Մեսրոպեան ըսած է, թէ այդքանով պէտք չէ բաւարարուիլ: Ան կոչ-պահանջով դիմած է Հայաստանի կառավարութեան ու յատկապէս արտաքին գործոց նախարարութեան, որ վերջիններս միայն եղածը դատապարտելով չբաւարարուին:

«Անոնք պէտք է միջազգային կառոյցներու առջեւ բողոքով հանդէս գան` ցեղասպան Թուրքիոյ դէմ»,– ըսած է ան` աւելցնելով, թէ ճիշդ չի համարեր  խումբ մը հայ երիտասարդներու կոչերը, թէ իրենք պատրաստ են ինքնապաշտպանական ջոկատներ ստեղծել եւ մեկնիլ Լաթաքիա ու Քեսապ: Ըստ Վազգէն Մեսրոպեանի` անոնք այդպիսով կը վիրաւորեն սուրիահայութեան:

«Քեսապահայերն այս պահուն միայն կացարանի խնդիր ու կարիք ունին: Մնացած բոլոր հարցերը կը հոգան շտապօգնութիւնը եւ Արամ Ա. Կաթողիկոսը»,- տեղեկացուցած է բանախօսը:

Վազգէն Մեսրոպեան նաեւ ըսած է, որ այս պահուն ահաբեկիչները կը գտնուին
հայկական եկեղեցւոյ մէջ եւ իջեցուցած են եկեղեցւոյ թէ՛ դուրսի, թէ՛ ներսի խաչերը:

www.tert.am