Լեհ երաժշտահան  եւ խմբավար Քշիշտոֆ Պենտերեցկիի եւ Հայաստանի պետական ֆիլհարմոնիկ նուագախումբի կատարմամբ «Քշիշտոֆ Պենտերեցկիի օրեր Հայաստանի մէջ» ձեռնարկներու ծիրէն ներս հայ ունկնդիրը առաջին անգամ լսեց անուանի խմբավարի ջութակի, ալտի եւ նուագախումբի համար գրուած Concerto Doppio ստեղծագործութիւնը:

Մայեսթրոյի ղեկավարութեամբ` գործը ֆիլհարմոնիկի հետ կատարեցին ջութակահար Ագատա Շիմչեւսկան եւ ալտահար Ռոպերթ Կապառան: Բացի անկէ, համերգին ընթացքին խմբավարի ղեկավարութեամբ հնչեց նաեւ Պենտերեցկիի De Natura Sonoris թիւ 3 ստեղծագործութիւնը:

Երեկոյի ընթացքին Պենտերեցկիի 2-րդ սիմֆոնիան նուագախումբը կատարեց ՀՊՖՆ գեղարուեստական ղեկավար եւ գլխաւոր խմբավար Էդուարդ Թօփչեանի հետ: Լեհ երաժշտահանին նուիրուած երաժշտական ձեռնարկներու շարքի վերջին համերգին ներկայ էին ՀՀ վարչապետ Տիգրան Սարգսեան, մշակոյթի նախարար Յասմիկ Պօղոսեան, պաշտօնատար այլ անձիք, մշակութային գործիչներ եւ Պենտերեցկիի արուեստի երկրպագուներ:

«Ես շատ երջանիկ եմ եւ ուրախ, որ «Երեւանեան հեռանկարներ» փառատօնի սկիզբն ազդարարուեց այսպիսի միջոցառմամբ: Ստացուեց փառատօն` փառատօնի շրջանակում: Պենտերեցկին այսօր ապրող ամենահանճարեղ մարդն է, նման մեծութիւն չկայ: Ուրախ ենք, որ հայկական արմատներ ունի, եւ արդէն երրորդ անգամ իր հայրենիքում է: Սա մեծ միջոցառում է ոչ միայն Հայաստանի, այլեւ ամբողջ աշխարհի մշակութային կեանքում: Չորս օր հնչեցին մէծ կոմպոզիտորի բազմաթիւ ստեղծագործութիւններ: Բացառիկ է նաեւ այն, որ համերգներին մասնակցեցին մեծ թուով երիտասարդներ: Մայեսթրոն եւս ոգեւորուած է»,- «Արմէնփրէս»-ի փոխանցմամբ` նշեց «Երեւանեան հեռանկարներ» փառատօնի ղեկավար Ստեփան Ռոստոմեան:

Կատարումներէն ոգեւորուած` տօնական համերգի աւարտին հայ հանդիսատեսը յոտնկայս եւ անվերջ ծափահարութիւններով ճանապարհեց մայեսթրոյին:

«Պենտերեցկիի օրերը Հայաստանի մէջ» ձեռնարկներու շարքը կ’եզրափակուի յունուար 17-ին` Քշիշտոֆ Պենտերեցկիի կեանքի եւ գործունէութեան մասին պատմող «Լապիրինթոսի արահետներով» շարժանկարի ցուցադրութեամբ:

«Պենտերեցկիի օրեր» -ը մեկնարկեցին յունուար 13-ին «Արամ Խաչատրեան» համերգասրահին մէջ` Հայաստանի պետական երիտասարդական նուագախումբի եւ թաւջութակահար Բարտոշ Կոզիակի համատեղ ելոյթով: Այնուհետեւ յաջորդ օրը «Գաֆէսճեան» արուեստի կեդրոնին մէջ ելոյթ ունեցան ջութակահարներ Անոյշ Նիկողոսեան եւ Անի Կարապետեան, ալտահար Եանա Դարեան, թաւջութակահար Արամ Թալալեան, քլարնեթահար Դարկօ Բռլեկը եւ դաշնակահարներ Արթուր Աւանեսովն ու Ջուլիեթա Վարդանեանը:

Յունուար 15-ին Կոմիտասի անուան կամերային երաժշտութեան տան մէջ Հայաստանի պետական կամերային նուագախումբի եւ «Հովեր» կամերային երգչախումբի կատարմամբ հնչեցին Պենտերեցկիի բարոկկօ ոճով երեք պիեսներ:

Լեհ երաժշտահան եւ խմբավար Քշիշտոֆ Պենտերեցկին ծնած է 1933 թուականին: Յայտնի է, որ անոր նախնիները եղած են լեհեր, ուքրանիացիներ, գերմանացիներ եւ հայեր: Հայաստան այցի ժամանակ ան յայտարարած է, որ երջանիկ է վերադառնալ տուն: Քշիշտոֆ Պենտերեցկին երեք անգամ արժանացած է «Գրեմի» մրցանակին: Բազմաթիւ այլ մրցանակներու դափնեկիր է: Պատուաւոր դոկտորի եւ փրոֆէսորի կոչումներ  ստացած է բազմաթիւ հաստատութիւններէ: ՀՀ նախագահ Սերժ Սարգսեանի հրամանագիրով 2013-ի նոյեմբերին Քշիշտոֆ Պենտերեցկիի յոբելեանի առիթով պարգեւատրուած է «Հայրենիքին մատուցած ծառայութիւններուն համար» 1-ին աստիճանի մետալով: Պարգեւը մեծանուն երաժշտահանին  յանձնած է ՀՀ մշակոյթի նախարար Յասմիկ Պօղոսեան:

http://armenpress.am