Յունուար 5-ին Պարսելոնայի Սանթա Քոլոմա շրջանի կեդրոնական եկեղեցւոյ մէջ (Iglesia Mayor), Սուրբ Ծննդեան տօներուն առթիւ մատուցուեցաւ Սուրբ եւ Անմահ պատարագ:
Սբ. պատարագին ներկայ էին Քաթալոնիոյ կառավարութեան, քաղաքային իշխանութեան, ինչպէս նաեւ կաթոլիկ եկեղեցւոյ տարբեր եղբայրութիւններու (congregaciցn) ներկայացուցիչներ:
ինչպէս «Հայերն այսօր»-ին կը յայտնէ Ժ. Դաւթենցը, Սուրբ Ծննդեան  պատարագին  իրենց մասնակցութիւնը բերած էին նաեւ բազում հայ հաւատացեալներ:
Յաւարտ Սուրբ պատարագի կատարուեցաւ ջրօրհնէքի արարողութիւն` կնքահայրութեամբ ԿարէնՓափախչեանի, ինչպէս նաեւ տեղի ունեցաւ տիեզերական աղօթք` աշխարհի խաղաղութեան համար:
Եկեղեցական արարողութիւններու աւարտին Քաթալոնիոյ իշխանութեան ներկայացուցիչն  իր ողջունի խօսքն ուղղեց պատարագին ներկայ հայ համայնքի ներկայացուցիչներուն`  շնորհաւորելով անոնց Սուրբ Ծննդեան տօներուն ուրախ առիթով, յիշատակելով  նաեւ  հայ  ազգի  անցած դժուարին ուղին ու անոր պայքարող տեսակի մասին:
Սբ. պատարագի աւարտէն ետք օրուան  կնքահայր՝ Կարէն Փափախչեանի ընտանիքին  կողմէն կազմակերպուած էր Սուրբ Ծննդեան տօներուն յատուկ  կերակրատեսակներով  հիւրասիրութիւն: