«Հայերն այսօր»-ի տեղեկացմամբ, ՀՀ սփիւռքի նախարար Մխիթար Հայրապետեան ցաւակցութիւն է յայտնել աշխարհահռչակ շանսոնյէ Շառլ Ազնաւուրի մահուան կապակցութեամբ:

Մխիթար Հայրապետեանը «ֆեյսպուք»-ի իր էջում մասնաւորապէս գրել է.«Այսօր միլիոնաւոր մարդկանց պէս ես էլ կարդացի համաշխարհային մամուլը վայրկենապէս հեղեղած մի լուր, որը սկզբում պարզապէս անհաւատալի թուաց, յետոյ խորը տխրութեամբ կտրեց իրականութիւնից ու տարաւ աշխարհի ամենագեղեցիկ ու ներդաշնակ երաժշտութեան աշխարհը, ազնաւուրեան աշխարհը:

Դեռեւս օրեր առաջ մենք բոլորս պարզապէս երազում էինք այն մասին, որ լեգենդը կ’այցելի Հայաստան ու կը տեսնի նորովի ծաղկող, վերափոխուած իր հայրենիքը, որի մասին այդքան երազում էր: Դեռեւս օրեր առաջ քայլելով Ազնաւուրի անուան հրապարակում` մենք զգում էինք ազնաւուրեան շունչն աւելի քան երբեք, մենք զգում էինք, որ դարձեալ մէկ օր հայաստանեան բեմերից մէկում լսելու ենք «Քեզ համար, Հայաստան»-ը՛, «Նա»-ն, «Մայրիկ»-ը: Ի վերջոյ, մենք զգում էինք ու վստահ էինք, որ Ազնաւուր անունով աստղը չի մարելու, որ Ոսկէ դարի վերջին կենդանի լեգենդը նորից երգելու է «Խուլ» սիրոյ ու մարդկային հոգու մասին:

Աշխարհահռչակ շանսոնյէն հայկական մեծ զգայուն սրտով, եզակի խարիզմայով ու անկրկնելի տաղանդով մշտապէս կ’ուղեկցի մեզ ու կը պատմի հանճարեղ լինելու, թեթեւ ապրելու ու միշտ ժպտալու իր առեղծուածը»: