Հայ շարժանկարի 95-ամեակին ընդառաջ` Հայաստանի ազգային կեդրոնը շարունակաբար պիտի իրականացնէ բացօթեայ  շարժանկարի ցուցադրումներ Երեւանի այգիներուն ու պուրակներուն մէջ: Երեւանի տարբեր վարչական համայնքներու մէջ (Մալաթիա-Սեբաստիա, Շէնգաւիթ, Նոր-Նորք, Աջափնեակ, Կեդրոն) պիտի ցուցադրուին հին ու նոր հայկական շարժանկարներ, ներառեալ` գեղարուեստական, մանկական  ու երաժշտական զուարճալի շարժանկարներ:

Հայաստանի ազգային շարժանկարի  կեդրոնի  ֆէյսպուքեան էջէն կը տեղեկանանք, որ յունիս 13-15 Գաֆէսճեան պուրակին մէջ (Կասկադ) տեղի պիտի ունենայ շարժանկարի ցուցադրումներ. յունիս 13-ին պիտի  ցուցադրուին «Տգէտը» (1995թ., 9ր., բեմադրիչ Ա. Մանարեան), «Թափառում» (83ր., 2011թ., բեմադրիչ Ա. Յարութիւնեան), յունիս 14-ին` «Անբան Հուռին» (2016թ., 22ր, Ա. Միքայէլեան), . «Խաթաբալա» (1970թ., 69ր., բեմադրիչ Իւ. Երզնկեան), յունիս 15-ին` («Գտնուած երազ», 1976թ., 9ր., բեմադրիչ Հ.Դիլաքեան), «Փրկութեան քարտէզ» (88ր, 2015 թ., Ա. Շահբազեան, Մ. Սարիբէկեան):