Եգիպտոսի խորհրդարանի Պաշտպանութեան եւ ազգային անվտանգութեան յանձնախումբի նախագահի տեղակալ Եահիա Քիտուանի եւ Արտաքին յարաբերութիւններու յանձնախումբի քարտուղար Թարէք Խուլի կրկին արծարծած են 1915 թուականի հայերու կոտորածները որպէս ցեղասպանութիւն ճանչնալու հարցը:

Երկու պատգամաւորները վկայակոչած են Հոլանտայի խորհրդարանի օրինակը եւ Եգիպտոսի խորհրդարանէն պահանջած են նմանօրինակ որոշում:

Ըստ Քիտուանիի` անհրաժեշտ է նման քայլ ձեռնարկել հակադարձելու համար Թուրքիոյ շարունակուող ոտնձգութիւններուն: Ան աւելցուցած է, որ Հայոց կոտորածները պատմական իրողութիւն են, եւ բոլորն ալ պարտաւոր են յստակ դիրքորոշում ունենալու:

Իր հերթին, Թարէք Խուլի լրատուամիջոցներուն տուած հարցազրոյցի ընթացքին յայտնած է, որ Եգիպտոսը պատմութեան ականատեսն է` ապաստան տալով հայերուն:

 «Ջարդերը վերապրածներու թոռները կ՛ապրին մեզի հետ, հետեւաբար Օսմանեան պետութիւնը վերակենդանացնելու ծրագիրները պէտք է բացայայտել եւ փշրել Թուրքիոյ հետապնդած ծաւալապաշտական երազները»,-ըսած է ան: