Նովոսիբիրսկի օփերայի եւ պալէի պետական ակադեմական թատրոնի ((ՆՕեւԲՊԱԹ) նոր գլխաւոր տնօրէն  նշանակուած է Արա Կարապետեան: Այդ մասին, ինչպէս կը տեղեկացնէ «Արմէնփրէս»-ը, «Ինտերֆաքս» գործակալութեան յայտնած են թատրոնի վարչակազմէն:

«Այսօր զինք անձնակազմին ներկայացուցած է ՌԴ մշակոյթի նախարար Վլադիմիր Մեդինսկին: Կարապետեանի թեկնածութիւնը դարձած է երկարատեւ համաձայնեցումներու, խորհրդակցութիւններու եւ մրցութային ընթացակարգերու արդիւնքը»,- ըսած է գործակալութեան զրուցակիցը:

Կարապետեան 1994 թուականին աւարտած է Լենինկրատի Ռիմսկի-Կորսակովի անուան պետական երաժշտանոցը` «Օփերայի-սիմֆոնիկ խմբավարութիւն» մասնագիտութեամբ:

1992 թուականին իր մասնագիտական գործունէութիւնը սկսած է Երաժշտանոցի երաժշտական թատրոնին մէջ Ջակոմօ Պուչինիի «Թոսկա» օփերայի բեմադրութեամբ: 1992-1997 թուականներուն եղած է Փերմի Չայկովսկիի անուան օփերայի եւ պալէի ակադեմական թատրոնի խմբավարը:

1997-2005 թուականներուն Ստանիսլաւսկիի եւ Տէմիրովիչ-Տանչենկոյի անուան երաժշտական թատրոնի (Մոսկուա) խմբավարն էր, 2005-էն մինչեւ 2013 թուականներուն` այդ թատրոնի կարգադրիչ-տնօրէնը, իսկ 2013-2016 թուականներուն գրաւած է գլխաւոր տնօրէնի պաշտօնը:

2016 թուականի սեպտեմբերէն մինչեւ 2017 թուականի մայիս ան եղած է Հարբինի (ՉԺՀ) Մեծ թատրոնի եւ Տեանցզինի Մեծ թատրոնի (ՉԺՀ) փոխնախագահը եւ արուեստական տնօրէնը:

2017 թուականի սեպտեմբերէն կը գրաւէ Մոսկուայի Պոկրովսկիի անուան պետական ակադեմական կամերային երաժշտական թատրոնի տնօրէնի պաշտօնը: