Դեկտեմբեր  24-ին Աստանայի «Վան» հայկական մշակութային կեդրոնի նախաձեռ­նութեամբ «Թան» սրճարանին մէջ համայնքի  ներկայացուցիչներուն եւ կիրակնօրեայ դպրոցի աշակերտներուն հա­մար կազմակերպուած էր Նոր Տարուայ  հանդէս: Հայկական սրճարանը առտուընէ տօնական տեսք  ստացած էր եւ իր հիւրընկալ դռնե­րը բացած մեր հայրենակիցներուն առջեւ: Հաւաքուած էին  փոքրերն ու մեծերը, որպէս­զի միասին նշեն  մեր հայկական  նոր Տարին եւ Սուրբ  ծնունդը:

Կը հնչէին ուրախ երգն ու պարը, «Նաիրի» պարային խումբի  աղջիկները կը հիացնէին իրենց նազանքով, իսկ երբ առաջ եկան Կատուալեան 4 եղբայրները  եւ անոնց երեքամեայ քոյրը` Գոհարիկը,  եւ կատարեցին  «Մենք քաջ տոհմի զաւակներն ենք» երգը, սրճարանը թնդաց ծափողջոյն­ներու տարափէն: Ատոր յաջորդեցին հայկական ազատագրական երգերը: Ներկաներուն հիացուց Օֆելեայ  Խաչատրեանի  գեղեցիկ կատարումը «Մենք հայ ենք» հրաշալի երգի: Համերգը` համերգ, բայց, ի հարկէ, բոլորը կը սպա­սէին ամանորեայ նուէրներու: Եւ երբ դռներուն մօտ երեւցան Ձիւնանուշն ու Ձմեռ պապը, բոլորը հասկցան, որ այդ «բաց»ն ալ շուտով կը լրացուի: Եւ իրօք, հովանաւոր­ները, համայնքի  նախագահ Սահակ Սալումեանի նախաձեռնութեամբ, հոգացած էին այն մասին, որ  ոեւէ երեխայ առանց նուէրի չմնայ:

Շնորհակալութիւն բոլոր անոնց, որոնք կազմակերպած էին այս գեղեցիկ տօնը: Շնորհաւոր Ամանոր եւ Սուրբ  ծնունդ:

Աստանա,  Հայաստան Մնէյեան