Գերմանիոյ մէջ գործող «Վտանգուած ժողովուրդներ» իրաւապաշտպան կազմակերպութիւնը կը պահանջէ գերմանական քաղաքներուն մէջ Հայոց ցեղասպանութեան եւ այլ քրիստոնեայ փոքրամանսութիւններու զոհերու յիշատակին նուիրուած յուշարձաններ կանգնեցնել:

Ինչպէս կը տեղեկացնէ «Deutsche Welle» լրատուամիջոցի թրքական ծառայութիւնը, իրաւապաշտպան կազմակերպութիւնը պահանջը ներկայացուցած է Գերմանիոյ քաղաքներու քոնկրէսին: Պահանջ-նամակը փոխանցուած է քոնկրէսի նախագահ Եւա Լոհսէին:

«Վտանգուած ժողովուրդներ» կազմակերպութեան ներկայացուցիչ Քեմալ Սիդոն նշած է, որ Գերմանիան տեղեակ  եղած է Օսմանեան Կայսրութեան կողմէ իրագործուող կոտորածներու մասին:

«Այդ իսկ պատճառով շատ կարեւոր է ջանքեր գործադրել, որպէսզի այստեղ ապրող հայերուն եւ միւս տուժած ժողովուրդներու ներկայացուցիչներուն թոյլ չտանք, որ մոռնան կատարուածը, եւ  վայր մը յատկացնենք, ուր յարգանքի տուրք կը մատուցեն զոհերուն»:

Կազմակերպութեան յայտարարութեան մէջ կը նշուի, որ Օսմանեան Կայսրութիւնը բացի հայերու ցեղասպանութենէն իրականացուցած է նաեւ այլ քրիստոնեայ փոքրամասնութիւններու կոտորածներ, որոնց զոհ  դարձած են մօտ 1.5 միլիոն մարդ, կը գրէ Ermenihaber.am-ը: