Սքոթ Աւետիսեանը կը համարեն յարատեւ քաղաքապետ. արդէն 17 տարի ազգութեամբ հայ ամերիկեան քաղաքական գործիչն ու Հանրապետական կուսակցութեան անդամը կը ղեկավարէ ԱՄՆ Ռոյտ Այլնտ նահանգի Վարուիք քաղաքը:

«Հայերն այսօր»-ը, յղում կատարելով rusarminfo.ru կայք-էջին, կը յայտնէ, որ 52-ամեայ Վարուիքի քաղաքապետը Հայոց ցեղասպանութիւնը վերապրածներու ժառանգ է: Ծնած, ապրած ու իր մասնագիտացած աշխատանքի ողջ մասը նուիրած է Ատլանտեան ովկիանոսի ափին գտնուող ամերիկեան նահանգի մեծութեամբ երկրորդ քաղաքին:

Աւետիսեան կրթութիւն ստացած է Ռոտ Այլնտի մայրաքաղաքին` Փրովիտենսի մէջ, այնուհետեւ ուսանած է Ռոճեր Ուիլեամսի համալսարանին եւ Հարվարտի Ճոն Քէնետիի անուան կառավարման դպրոցին մէջ:

1990-ական թուականներուն սկիզբը Սքոթ Աւետիսեան կը վերադառնայ հարազատ քաղաք եւ կ’ընտրուի քաղաքային խորհուրդի անդամ: Այս պաշտօնին ան  կ’աշխատի շուրջ 10 տարի:

Սքոթ Աւետիսեան առաջին անգամ 85 հազար բնակչութիւն ունեցող Վարուիք քաղաքի քաղաքապետ  ընտրուած է 2000 թուականին: Այդ ժամանակ ան դարձաւ ոչ միայն ամերիկեան քաղաքի ազգութեամբ հայ առաջին քաղաքապետը, այլեւ` Ռոտ Այլնտ նահանգի ամենաերիտասարդ քաղաքապետը:

Պաշտօնավարման առաջին շրջանի յաջողութիւնը երաշխիք դարձաւ յաջորդող ընտրութիւններուն ժամանակ, իսկ 2011 թուականին Նիւ Եորք Թայմսը Սքոթ Աւետիսեանը ներառեց ԱՄՆ 10 ամենահեղինակաւոր քաղաքապետներուն շարքին:

Աւետիսեանի յաջողութեան բանալին այն է, որ ան  յաջողած է առաւելագոյն ձայներ հաւաքելու Վարուիքի բոլոր ընտրական տեղամասերուն մէջ: 2017 թուականի օգոստոս 1-ին կայացած ընտրութիւններուն արդիւնքը բացառութիւն չէր. Աւետիսեան հաւաքեց ձայներու 65,1 %-ը եւ մեծ առաւելութեամբ կրկին յաղթեց քաղաքապետի ընտրութիւններուն:

Սքոթ Աւետիսեան նահանգի հայկական համայնքի աշխոյժ անդամ է եւ յաճախ  հանդէս կու գայ Հայոց ցեղասպանութեան ճանաչման կոչերով: Ռոտ Այլնտի ներկայացուցիչներու պալատը 2017 թուականի ապրիլին ընդունած է 20-րդ դարու առաջին Ցեղասպանութիւնը դատապարտող բանաձեւ: