Աւստրալիոյ Նոր Հարաւային Ուէլս նահանգի վարչապետ Կլետիս Պերեճիքլեան յոյս ունի յաջորդ տարի Հայաստան այցելելու:

Այս մասին Կլետիս Պերեճիքլեան յայտնած է NEWS.am-ին տուած հարցազրոյցին:

Որ՞ն է ձեր հիմնական նպատակը որպէս Նոր Հարաւային Ուէլս նահանգի վարչապետ:

Նոր Հարաւային Ուէլս նահանգին մէջ կ’ապրի 7․8 մլն մարդ, ու այն Աւստրալիոյ վեց նահանգներէն խոշորագոյնն է: Աւստրալիոյ բնակչութեան մօտ մէկ երրորդը կ’ապրի հէնց այդ նահանգին մէջ, որ երկրի ամենաարագ աճող ու զանազան տնտեսութիւն ունեցող նահանգն է: Նահանգի տնտեսութիւնը աւելի մեծ է, քան օրինակ Իռլանտայի, Նորվեկիոյ կամ Իսրայէլի տնտեսութիւնը:

Վարչապետի դերակատարումը հաւասար է ԱՄՆ-ի մէջ նահանգապետի դերակատարման: Վարչապետը կառավարութեան առաջնորդն է, ամենաբարձրաստիճան դէմքը, որ որոշումներ կը կայացնէ: Վարչապետը կը ղեկավարէ ու կը համակարգէ նախարարութիւններու աշխատանքը պիւտճէի, քաղաքականութեան ու նոր օրէնսդրութեան հարցերով:

Դուք 2013-ին Հայաստան ու Լեռնային Ղարաբաղ  այցելած էք աւստրալական քաղաքական գործիչներու պատուիրակութեան կազմին մէջ: Կը պատմէ՞ք այդ ուղեւորութենէն ձեր տպաւորութիւններուն մասին:

Ես հնարաւորութիւն ունեցայ այցելելու Հայաստան 2013-ի յուլիսին` Նոր Հարաւային Ուէլս նահանգի խորհրդարանին մէջ Հայաստանի բարեկամներու խորհրդարանական պատուիրակութեան շրջանակէն ներս: Մենք այցելեցինք Երեւան, Արցախ ու Հայաստանի  որոշ մարզեր: Այդ ուղեւորութիւնը իմ ու իմ գործընկերներուս համար յիշարժան էր անով, որ ապահովեց ոչ միայն հայկական կենսակերպի խոր ընկալում, այլեւ Հայաստանի խնդիրներու ու հասանելի ռազմավարական կարեւոր հնարաւորութիւններու ընկալում:

Խոհրդարանին մէջ դուք մշտապէս կը բարձրացնէիք հարցեր, որոնք կը վերաբերին հայերու շահերուն, ներառեալ Ցեղասպանութեան ճանաչման ու ղարաբաղեան հարցերը: Ձեր կարծիքով Աւստրալիան երբեք կրնա՞յ ճանչնալ Հայոց ցեղասպանութիւնը:

Ըլլալով Հայոց ցեղասպանութիւնը վերապրածի թոռնուհի` ես հպարտ եմ իմ հայկական ժառանգութեամբ ու կը շարունակեմ աջակցիլ Հայոց ցեղասպանութեան ճանաչման: Այս տարի մենք կը նշենք Նոր Հարաւային Ուէլսի խորհրդարանին կողմէ Հայոց ցեղասպանութեան միաձայն ճանաչման 20-րդ տարեդարձը: Խորհրդարանի այգիին մէջ նաեւ խաչքար  տեղադրուած է` Ցեղասպանութեան զոհերու յիշատակին: Ես յոյս ունիմ յաջորդ տարի այցելելու Հայաստան արդէն որպէս Նոր Հարաւային Ուէլս նահանգի վարչապետ: