Forbes ամսագիրի ռուսական ծառայութիւնը կազմած է Ռուսիոյ ամենահարուստ մարդոց վարկանիշային աղիւսակը, որուն մէջ տեղ  գտած է 200 գործարար:

Վարկանիշային աղիւսակին  ներառուած են հայկական ծագում ունեցող 8 գործարարներ, կը յայտնէ 1in.am-ը:

18-րդ հորիզոնականին մէջ կը գտնուի Սերգէյ Գալիցկին (Յարութիւնեան), որ «Մակնիթ» առեւտրի ցանցի գործադիր տնօրէնն է: Անոր կարողութիւնը կը կազմէ 6.8 միլիար տոլար:

«Տաշիր Գրուպ» ձեռնարկութեան սեփականատէր Սամուէլ Կարապետեանի կարողութիւնը նախորդ տարուան համեմատ աւելցած է 300 միլիոն տոլարով: Ան 3.4 միլիար տոլարով գրաւած է 32-րդ հորիզոնականը:

«Ռոսգոսստրախ» ընկերութեան համասեփականատէր եւ գործադիր տնօրէն Դանիլ Խաչատուրովը` 2 միլիար տոլար կարողութեամբ, 48-րդ տեղը գրաւած է:

Վարկանիշային աղիւսակին մէջ տեղ գտած են նաեւ Ռուբէն Վարդանեան, որ գրաւած է 99-րդ հորիզոնականը եւ ունի 950 միլիոն տոլարի կարողութիւն, «Սքարլէթ» ընկերութեան հիմնադիր Ալպերթ Աւտոլեան (800 միլիոն տոլար), Նիքոլա եւ Սերգէյ Սարգիսովները (700 միլիոն տոլար) եւ Mamba եւ Badoo ծանօթութիւններու կայքերու հիմնադիր Անտրէ Անտրէեւը (Անդրէ Օհանջանեան), որուն կարողութիւնը գնահատուած է 500 միլիոն տոլար:

Նշենք, որ վարկանիշային աղիւսակը կը գլխաւորէ «Նովատէկ» ընկերութեան համահիմնադիր Լէոնիտ Միխելսոն` 18.4 միլիար տոլար կարողութեամբ: Ռուսիոյ երկրորդ ամենահարուստ մարդը «Սեւերստալ» ընկերութեան  տնօրէններու խորհուրդի նախագահ Ալեքսէյ Մարդաշովն է (17.5 միլիար տոլար): Եռեակը կ’եզրափակէ Նովոլիպեցկի մետ  արուլգիական գործարանի համասեփականատէր Վլատիմիր Լիսին (16.1 միլիար տոլար):