Մեծանուն շանսոնիէ Շառլ Ազնաւուր հայերէն կը խօսի, բայց չի գրեր եւ չի կարդար, սակայն ատիկա չի խանգարեր անոր Զուիցերիոյ մէջ ՀՀ դեսպանի իր աշխատանքին: Այդ մասին ան ըսած է սպանական El Mundo պարբերականին տուած հարցազրոյցի ժամանակ, կը գրէ «Sputnik-արմենիա»-ն:

Ազնաւուր Մատրիտ կը գտուի համաշխարհային համերգային շրջագայութեան ծիրէն ներս:

92-ամեայ երաժշիտին համերգը պիտի կայանայ Մատրիտի Barclaycard Center-ի մէջ: Ազնաւուր Մատրիտի մէջ վերջին անգամ ելոյթ ունեցած է 2015-ի Մայիսին:

Շանսոնիէն պատմած է, որ կը համատեղէ երաժշտական գործունէութիւնը դիւանագիտական աշխատանքին հետ:

Երգիչը խոստովանած է, որ ինք չի գիտեր ՀՀ օրհներգը ու չի գրեր եւ կարդար հայերէն, բայց ատոնք չեն խանգարեր անոր դիւանագիտական աշխատանքին: «Այնպէս եղաւ, որ ես դարձայ Զուիցերիոյ մէջ Հայաստանի դեսպանը եւ մշտական ներկայացուցիչը ՄԱԿ Ժնեւի կենտրոնակայանին մէջ»,- ըսած է Ազնաւուրը:

Ան յայտնած է, որ դիւանագիտական պաշտօն ստանձնելու առաջարկը ստացած է 8 տարի առաջ` 2009-ին, ՀՀ նախագահ Սերժ Սարգսեանէն եւ որոշած է ընդունիլ զայն: