Հայկական Սուրբ Գրիգոր եկեղեցական համալիրը ուքրանական Պերեժան պատմաճարտարապետական արգելոցին կողմէ տրամադրուած է Դեռնոփոլի հայ հոգեւոր համայնքին` Հայ առաքելական եկեղեցւոյ ուքրանական թեմին: Այս մասին, ըստ Hayernaysor.am-ի, կը հաղորդէ AnalitikaUA.net-ը:

Ուքրանիոյ հայ համայնքի ղեկավար Վիլէն Շատուորեան այս իրադարձութիւնը անուանած է պատմական եւ շնորհակալութիւն յայտնած անոնց, որոնք նպաստած են եկեղեցւոյ փոխանցման: Շատուորեանի խօսքով` հայ համայնքին համար կարեւոր է իւրաքանչիւր պատմամշակութային տարածք, եւ իրենք կը հպարտանան Ուքրանիոյ հայ համայնքի հարուստ մշակութային եւ պատմական ժառանգութեամբ: «Մենք պիտի ընենք հնարաւորը` պահպանելու եւ մասայականացնելու պատմական, ճարտարապետական եւ մշակութային ժառանգութիւնը»,- ըսած է Շատուորեան:

Սուրբ Գրիգոր հայկական եկեղեցին կառուցուած է 1764 թուականին` նախապէս այնտեղ եղած հայկական փայտէ եկեղեցւոյ տեղը: