Սեպտեմբերի 5-ին, Երուսաղէմի Ժառանգաւորաց Վարժարանի հանդիսութիւնների սրահում տեղի ունեցաւ Ժառանգաւորաց Վարժարանի եւ Ընծայարանի 173-րդ ուսումնական տարուայ պաշտօնական բացումը:

Միաբանութեան՝ սրահ մուտք գործելուց յետոյ, սաները նախ երգեցին Վարժարանի հիմնը, որից յետոյ տեսուչ Տ. Թէոդորոս Վրդ. Զաքարեանը ընթերցեց «Սերմնացանի» առակը: Աւետարանի ընթերցումից յետոյ Տեսուչ Հ. Սուրբը ներկաներին փոխանցեց իր ողջոյնի խօսքը , որի աւարտին Պատրիարք Սրբազան Հայրը սաներին եւ ուսուցչական կազմին տուեց իր հայրական խրատն ու օրհնութեան խօսքը:

Արարողութիւնից յետոյ Պատրիարք Սրբազանը եւ Միաբան Հայրերը հանդիպեցին ուսուցչական կազմի հետ:

Այս տարի Վարժարանը ունի 30 ուսանողներ: Երկու շաբաթից14 նոր ուսանողներ պիտի ժամանեն Երուսաղէմ՝ ուսանելու համար Վարժարանում:
Երուսաղէմի Ժառանգաւորաց Վարժարանը եւ Ընծայարանը ամենահին կրօնական կրթական հաստատութիւնն է Հայ Եկեղեցու մէջ, որը հաստատուել է 1843-ին: