ՀՀ սփիւռքի նախարարութեան «Արի տուն» ծրագիրի 6րդ փուլի մասնակից Նոնա Մինասեան հայրենիք  եկած է Ռուսաստանի Դաշնութեան Վոլկոկրատ քաղաքէն: 17 տարեկան է, ծնած է Հայաստան, մէկ տարի դպրոց  յաճախած է, սակայն կեանքի բերումով 2007 թուականին ընտանիքին հետ տեղափոխուած է Ռուսաստան: Սակայն հայրենիքի հանդէպ ունեցած սէրը երբեք չէ մարած:

«Ես միշտ շատ  սիրած եմ Հայաստանը ու երբ այստեղէն հեռու կ’ըլլամ, շատ կը կարօտնամ: Ռուս ընկերներուս այնքան  պատմած եմ Հայաստանի մասին, որ անոնք արդէն ինքնուրոյն սկսան հետաքրքրուիլ ու համացանցի վրայ տեղեկութիւններ փնտրել: Անգամ կը ցանկան Հայաստան գալ, հայերէն սորվիլ, երբեմն ինծի բառերու նշանակութիւնը կը հարցնեն»,-«Հայերն այսօր»-ի թղթակցին հետ զրոյցին կը պատմէ Նոնան, որ Հայաստանէն մեկնելէն ետք արդէն 3-րդ անգամն է, որ կ’այցելէ հայրենիք:

«Երբ մեկնելէ յետոյ առաջին անգամ եկայ Հայաստան, շատ մեծ փոփոխութիւններ զգացի, երկիրս աւելի  գեղեցկացած էր: Ուրախ եմ, որ կը մասնակցիմ «Արի տուն» ծրագիրին: Շրջագայութիւններուն ընթացքին ինծի շատ  տպաւորած է Գառնիի հեթանոսական տաճարը եւ Գեղարդի բնութիւնը»:

Զրոյցին ընթացքին Նոնան նաեւ նշեց, որ դպրոցը աւարտելէ ետք կը ցանկայ գալ եւ ուսումը շարունակել Հայաստանի մէջ. «Մեծ ցանկութիւն ունիմ գալ եւ այստեղ ապրիլ, սորվիլ, քանի որ շատ կը կարօտնամ: Ամէն անգամ, երբ Հայաստանէն կը մեկնիմ, ողջ տարին անհամբեր կը սպասեմ, թէ երբ կրկին հայրենիք պիտի գամ»:

«Հայերն այսօր»-ի միւս զրուցակիցը` Վաչագան Այրումեան, եկած է Ռուսաստանի Դաշնութեան Մաժասք քաղաքէն: Ծնած է Հայաստանի մէջ, 8 ամսականին ընտանիքին հետ մեկնած է Ռուսաստան: Վաչագան բռնցքամարտով կը զբաղի: Հայերէն գրել, կարդալ կը դժուարանայ, բայց ցանկութիւն ունի սորվելու:

«Մեր քաղաքին մէջ հայեր գրեթէ չկան, բայց Մոսկուայի մէջ շատ կան: Այնտեղ հայ համայնքը պարբերաբար տարբեր ձեռնարկներ կը կազմակերպէ,- «Հայերն այսօր»-ի հետ զրոյցին ըսաւ  Վաչագան ու աւելցուց, որ հայրենիքը շատ կը սիրէ, ամէն տարի Հայաստան կու գայ եւ ցանկութիւն ունի այստեղ ապրելու,- Հայրենիքս շատ կը սիրեմ, ինծի համար հարազատ է անոր ամէն մէկ անկիւնը` Գառնին, Գեղարդը, Խոր Վիրապը: Ռուս ընկերներուս անընդհատ կը պատմեմ Հայաստանի մասին, անոնց հայերէն բառեր կը սորվեցնեմ: Անոնք գիտեն, որ հայերը շատ հիւրընկալ են»:

Արփի Պետրոսեան

ԵՊՀ Լրագրութեան բաժանմունքի 2-րդ շրջանի ուսանողուհի