Նախագահութեամբ Իրաքի Հայոց Թեմի առաջնորդ գերշ. Տ Աւագ արք. Ասատուրեանի Յուլիս 8-ին Ազգային ծերանոցի Սբ. Կարապետ եկեղեցւոյ մէջ, տեղի ունեցաւ Սբ. Պատարագ և Հոգեհանգստեան պաշտօն Յուլիս 3-ին Քարատա թաղամասին մէջ ահաբեկչութեան հետեւանքով զոհուածներու հոգիներուն համար:

Այս մասին Տէր Մամբրէ Քահանայ Հմայեակեան գրած է Իրաքի Հայոց Թեմի ֆէյսպութեան էջին վրայ..

Սբ. Պատարագի աւարտէն ետք պաղտատահայերու հոծ բազմութիւն մը քահանայ հայրերու, Ազգային Կեդրոնական Վարչութեան և միութենական հաստատութիւններու վարչականներու գլխաւորութեամբ այցելեցին պայթումի վայր, ուր տեղի ունեցաւ մոմավառութիւն, շարականներու երգեցողութիւն և աղօթք անմեղ զոհուածներուն համար:

Նախորդ օրը` Յուլիս 7-ի երեկոյան, Հայ Եկեղեցասիրաց Կազմի աշակերտները Սբ. Կարապետ եկեղեցւոյ բակին մէջ կանգնեցուած Հայոց Ցեղասպանութեան նահատակներու յիշատակը անմահացնող խաչքարին առջև եւս իրականացուցին մոմավառութիւն ի յիշատակ ահաբեկչութեան զոհերուն:

Նշենք, որ զոհուածներուն մէջ հայեր չկան: