Վերջին երկու ամիսներուն, Արեւմտեան Ամերիկայի ՀԵԴի նախաձեռնած «Մեր զինուորներուն կողքին» արշաւը դրամահաւաք կը կատարէ եւ օժանդակութիւն կը հասցնէ Արցախի քառօրեայ պատերազմին զոհուած զինուորներու ընտանիքներուն։

Արեւմտեան Ամերիկայի ՀԵԴի Կեդրոնական վարչութեան նշանակած յատուկ մարմինը հրապարակած է իր առաջին հաշուետուութիւնը, ըստ որուն՝ Յունիս 30ի տուեալներով, ցարդ կարելի եղած է հաւաքել 105,000 տոլար, որուն շնորհիւ Հայաստանի եւ Արցախի մէջ օժանդակութիւն տրամադրուած է զոհուած զինուորներու 63 ընտանիքներու։ Նշեալ նահատակներուն ընտանիքներուն 39ն Հայաստանէն, իսկ 24ը՝ Արցախէն։

Նշենք, որ իւրաքանչիւր զոհուած զինուորի ընտանիքին կը յատկացուի 1000 տոլար, իսկ իւրաքանչիւր զաւակին համար, յաւելեալ 250 տոլար։

Ցարդ կատարուած են յատկացումներ 76,500 տոլարի, որուն 33,000 տոլարը Արցախ ապրող ընտանիքներու, իսկ 43,500 տոլարը՝ Հայաստան։

Յուլիսի առաջին օրերուն, յաւելեալ 14,500 տոլարի յատկացումներ կատարուած են Սիւնիքի բնակիչ, զաւակներ ունեցող 13  նահատակներու ընտանիքներու։

Ուղղակի ընտանիքներուն կատարուած նիւթական այս օժանդակութեանց կողքին, ՀԵԴի «Մեր զինուորներուն կողքին» արշաւը համակարգած է մօտաւորապէս 480,000 տոլար արժող դեղօրայքի եւ բանակին համար կենսական այլ առարկաներու առաքումը։

Ինչպէս արդէն հաղորդած էինք, արշաւը նաեւ ապահոված էր Թինա եւ Ռիչըրտ Վ. Գարոլաններու հիմնարկէն 30,000 տոլար նուիրատուութիւն մը, որուն շնորհիւ Արցախի բանակայիններուն 2000 քնապարկեր պիտի տրամադրուին, իսկ այդ քնապարկերը պիտի արտադրուին «Տեսի» ընկերութեան Հայաստանի Վաղարշապատ քաղաքի գործարանին մէջ։

ՀԵԴի «Մեր զինուորներուն կողքին» արշաւը շնորհակալութիւն կը յայտնէ բոլոր նուիրատուներուն եւ հովանաւորներուն, ներառեալ՝ «Global USA Shipping» եւ «Universal Service Exchange» ընկերութեանց, «Օլիմփիք» դեղարանի սեփականատէր Յակոբ Պասմաճեանին եւ Սան Ֆրանսիսքօ հաստատուած գործարար Էրիք Մարութեանին, որոնք կարեւոր դերակատարութիւն ունեցած են օժանդակութեան առաքումներուն մէջ։

Արշաւը նաեւ կոչ կ՛ընէ համայնքին, որ նուիրատուութիւնները շարունակէ կանխիկ աջակցութեամբ կամ կենսական առարկաներ նուիրելով։

Հարկաւոր առարկաներու շարքին են՝ լուսարձակներ, քնապարկեր, ելեքտրական բարդեր (լիթիում), շտապ օգնութեան նիւթեր, վիրապներ, վերարկուներ, անթացուպներ, հաշմանդամներու յատուկ կառքեր եւ դեղօրայք։

Նիւթական օժանդակութիւնները կարելի է ղրկել՝ 104 N. Belmont St. #313, Glendale, CA 91204 հասցէն, իսկ ապրանքերու յանձնումը պէտք է կատարուի մինչեւ Յուլիս 15, Կլենտէյլի Երիտասարդական կեդրոն (211 W. Chestnut St., Glendale, CA 91204)։ «Մեր զինուորներուն կողքին» արշաւին մասին յաւելեալ տեղեկութեանց կամ նուիրատուութեանց համար այցելել՝ www.withoursoldiers.com կայքը։