Իսլամական համագործակցութեան կազմակերպութեան Պոլսոյ վեհաժողովի ամփոփիչ փաստաթուղթին մէջ Ազրպէյճանի եւ Թուրքիոյ դրդումով տեղ գտած ձեւակերպումները ամբողջութեամբ կ՛աղաւաղեն Լեռնային Ղարաբաղի տագնապի էութիւնը, որ արդիւնք է Ազրպէյճանի` Լեռնային Ղարաբաղի ժողովուրդի ինքնորոշման իրաւունքը զինուորական եղանակով ճնշելու քաղաքականութեան: Այդ մասին յայտարարած է Հայաստանի արտաքին գործոց փոխնախարար Շաւարշ Քոչարեան:

«Տուեալ ձեւակերպումներով կը մերժուի ժողովուրդներու ինքնորոշման իրաւունքին նկատմամբ յարգանքը, որ կը հանդիսանայ նաեւ Իսլամական համագործակցութեան կազմակերպութեան նպատակներէն մէկը եւ որուն հիման վրայ ձեւաւորուած է այդ կազմակերպութեան անդամ պետութիւններու մեծամասնութիւնը», արտաքին գործոց նախարարութեան մամլոյ եւ տեղեկատուութեան վարչութեան փոխանցումով, ի պատասխան «Նիւզ»-ի հարցումին ըսած է Քոչարեան` շարունակելով. «Իրական յարձակող Ազրպէյճանը կը ներկայացուի իբրեւ զոհ, ինչ որ կը նկատուի աջակցութիւն` Ազրպէյճանի կողմէ յարձակումներու նոր ալիք ծաւալելու եւ Լեռնային Ղարաբաղի տագնապին կրօնական երանգ հաղորդելու իր ջանքերուն»:

«Տարակուսանք կը յառաջացնէ, որ ինքնորոշուած ժողովուրդի դէմ ծայրայեղ ահաբեկչական կազմակերպութիւններու ձեռագիրով պայքարող Ազրպէյճանը եւ շրջանին մէջ անկայունութեան, ահաբեկչութեան եւ արիւնահեղութեան ալիք տարածող Թուրքիան կրցան իրենց` միջազգային եւ միջնորդ երկիրներու ջանքերուն հակադիր սադրիչ մօտեցումները անգամ մը եւս ներառել Իսլամական համագործակցութեան կազմակերպութեան փաստաթուղթերուն մէջ»,  ընդգծած է Հայաստանի արտաքին գործոց նախարարի տեղակալը: