Ամերիկայի հայերը քիւրտերու ու յոյներու հետ բողոքի ցոյց կազմակերպած են Ուաշինկթընի մէջ Պրուքինկի հիմնարկի շէնքին առջեւ, ուր դասախօսութիւն կը կարդար Թուրքիոյ նախագահ Ռեճէպ Թայիպ Էրտողանը:

Բողոքի ցոյցին մասնակցած են նաեւ եզտիներու ու կիպրացիներու համայնքներու, ինչպէս նաեւ մարդու իրաւունքներու հարցերով կազմակերպութիւններու ու նոյնիսկ  քանի մը ընդդիմադիր թրքական կազմակերպութիւններու ներկայացուցիչներ, կը յայտնէ Ամերիկայի «Հայ դատի» յանձնախումբը:

Ցուցարարներու ձեռքերուն պաստառներ էին` Հայոց ցեղասպանութեան ժխտման, քիւրտերու դէմ ճնշումներու, ԻՊ-ին Թուրքիոյ աջակցութեան մասին: Կը լսուէին «Կեցցէ Քիւրտիստանը, կեցցէ Հայաստանը» կարգախօսները:

Ամերիկայի «Հայ դատի» յանձնախումբը կը յայտնէ, որ Էրտողանի թիկնապահները թուրք լրագրողներուն թոյլ չէին տար մօտենալ բողոքի ցոյցին: Լրագրողներէն մէկուն դահլիճէն հանած էին դեռ մինչեւ Թուրքիոյ նախագահին գալը, թիկնապահները անոր գետին ձգած էին ու մէկ այլ թղթակիցի մըն ալ` ծեծած:

Շէնքին դիմաց մէկ այլ ցոյցի մասնակիցներն ալ իրենց աջակցութիւնը կը յայտնէին Թուրքիոյ կառավարութեան, անոնք «մենք կը սիրենք Էրտողանը» գրութեամբ վերնաշապիկներ  հագած էին: