Մարտ 23-25 Պուէնոս Այրէսի Մարգարիտա Խիրկուի անուան թատրոնի դահլիճին մէջ տեղի  ունեցած է «Յիշողութեան երաժշտութիւն» փառատօնը` նուիրուած Արժանթինի մէջ ռազմական յեղաշրջման եւ բռնատիրութեան   վերացման 40-ամեակին: Փառատօնը կազմակերպած էր մշակութային գործիչ Խորխէ Սատը: Այս մասին «Հայերն այսօրին» կը  յայտնէ արժանթինահայ տուտուկահար Գագիկ Գասպարեան, որ նոյնպէս մասնակցած է փառատօնին եւ ներկայացուցած Հայաստանը:

«Փառատօնին կը մասնակցէին Արժանթինի մէջ ստեղծագործող անուանի երաժիշտներ, որոնք ներկայացուցին արաժնթինեան ազգային երաժշտութիւնը, նաեւ ասմունքողներ կային: Ես, օգտուելով առիթէն, օտար հանդիսատեսին առջեւ հնչեցուցի Կոմիտասի «Չինար ես», «Հով, արէ՛ք», «Գարուն ա» եւ ֆրանսահայ երգահան Մարինա Քրիստինայի «Հայու հոգին» ստեղծագործութիւնները: Փառատօնին մասնակցութիւնս նուիրած էի Հայոց ցեղասպանութեան 101-րդ տարելիցին: Այդ մասին հանդիսատեսին բարձրաձայնեցի ելոյթէն ետք  եւ Հայոց ցեղասպանութեան մասին տեղեկութիւններ հաղորդեցի»,-«Հայերն այսօրի» թղթակիցին հետ զրոյցին ըսաւ Գագիկ Գասպարեան:

Փառատօնի ծիրէն ներս երաժիշտը նաեւ Պուէնոս Այրէսի Մորոնի շրջանի երաժշտանոցի ուսանողներուն եւ դասախօսներուն համար շուրջ 4 ժամ տեւողութեամբ վերապատրաստման դասընթացք  իրականացուցած է` նուիրուած հայ երաժշտութեան պատմութեան եւ հայկական փողային գործիքներուն: Դասախօսութեան մասնակցած է  30 մարդ:

«Բացի դասախօսութենէն, նաեւ տարբեր գործիքներով նուագեցի: Լսելով մեր մաքրամաքուր երաժշտութիւնը` օտարները հիացմունքի խօսքեր կը հնչեցնէին եւ շնորհակալութիւն կը յայտնէին, որ Արժանթինի մէջ կը տարածեմ հայկական մշակոյթը եւ անոնց հնարաւորութիւն կու տամ ծանօթանալու մեր երաժշտութեան: Ներկաներէն մէկը ըսաւ, որ մեր երաժշտական գործիքներէն հայ ժողովուրդին հազարամեայ պատմութիւնը կը զգամ: Աղջիկ մըն ալ նկատեց, որ տուտուկի հնչիւնները անոր հոգիին այնպէս  հասած են եւ այնպիսի ազդեցութիւն  ձգած, որ կարծես կը լսէ աշխարհի ձայնը եւ կը տեղափոխուի հին դարաշրջան»,-իր խօսքը եզրափակեց Գագիկ Գասպարեան: