Մոսկուայի Կարմիր հրապարակին վրայ, Պատմութեան թանգարանին մէջ, պիտի բացուի «Հայաստան. Գոյութեան Առասպելը» խորագիրով ցուցահանդէսը, ուր կը ներկայացուին Հայաստանի պատմութեան, Սուրբ Էջմիածինի Մայր աթոռի թանգարաններու եւ Մատենադարանի 160- է աւելի ցուցանմուշներ, armradio.am-ի փոխանցմամբ` նշուած է Ռուսաստանի պետական պատմութեան թանգարանի կայքին մէջ:

Հայաստանի պատմութեան թանգարանը պիտի ներկայացնէ Հայաստանի տարածքին մէջ յայտնաբերուած ցուցանմուշները, որոնք կ’ընդգրկեն մեր երկրի պատմութիւնը հնագոյն ժամանակներէն մինչեւ 19- րդ դարը: Թանգարանը կը նշէ, որ պիտի ներկայացուին նաեւ Հայաստանի պատմութեան հելլէնական շրջանի բաւականին հետաքրքիր նմուշներ, որոնցմէ մէկը նաեւ Ափրոտիտէ աստուածուհիի մարմարեայ արձանն է:

Հայաստան որպէս քրիստոնէութիւնը պետական կրօն առաջինը հռչակած երկիր` կը ներկայացնէ Մայր Աթոռի թանգարանին մէջ պահպանուող գեղարուեստական եւ պատմական արժէք ներկայացնող ցուցանմուշները: Ռուսաստանի պատմութեան թանգարանը այս առումով յատկապէս կ’առանձնացնէ Սուրբ Գէորգի մասունքները ամփոփող Խաչը:

Ռուսաստանի պատմութեան թանգարանը իր այցելուներու ուշադրութիւնը կը հրաւիրէ նաեւ Մատենադարանի ցուցանմուշներուն վրայ:

Ցուցահանդէսը պիտի բացուի Մարտ 10- ին` հաւանաբար Հայաստանի եւ Ռուսաստանի նախագահներու մասնակցութեամբ: