«Քալիֆորնիա Քուրիեր» թերթի հրատարակիչ եւ խմբագիր Յարութ Սասունեան կասկած չունի, որ ամերիկահայ բարերար, Հայաստանի ազգային հերոս Գըրգ Գըրգորեանի հարստութենէն  մաս մը պիտի ուղղուի հայկական բարեգործական ծրագիրներու: Այս մասին «Արմէնփրէս»-ի հետ զրոյցին ըսաւ Սասունեան` նշելով, որ ամերիկահայ մեծահարուստի կտակին մէջ ընդամէնը մէկ նախադասութիւն եղած է, որ իր ողջ հարստութիւնը կ’ուղղէ բարեսիրութեան:

«Պարոն Գըրգորեան երբեք իր կեանքին մէջ չէ զբաղած մանրամասնութիւններով, ան տուած է ընդհանուր ուղղութիւն, իր օգնականներն են, որ գործը կատարած ու պիտի կատարեն` ըստ իր փափաքին: Իր կտակին մէջ գրուած է, որ ամբողջ հասրտութիւնը կու տայ բարեսիրութեան` առանց մանրամասնելու, թէ ուր, հայ, թէ օտար կազմակերպութեան: Կտակի պատասխանատու կայ` կտակարար, մարդ, որ 50 տարի աշխատած է անոր հետ, շատ լաւ գիտէ պարոն Գըրգորեանի նախասիրութիւնները, մօտեցումները, մտայնութիւնը: Պարոն Գըրգորեան իր ամբողջ կեանքին մէջ նուիրաբերած է գումարներ թէ հայ, թէ օտար ծրագիրներու: Ես կասկած չունիմ, որ յետմահու ալ իր փափաքը նոյնն է` իր հարստութիւնը երթայ  հայկական ու ոչ հայկական բարեսիրական ծրագիրներու: Անշուշտ հայկականի մէջ կը մտնէ նաեւ Հայաստանը»,-ըսաւ Յարութ Սասունեան:

Ան նկատեց, որ դեռ կանուխ է այդ ծրագիրներուն մասին խօսիլը, քանի որ իրաւաբանական հարցեր կան: «MGM-ի մէջ իր ունեցած շահաբաժինները պէտք է վաճառուին, գումարի վերածուին, դեռ մէկ տարի այդ հարցերը պէտք է կարգարուորուին, յետոյ նկատի կ’առնուի, թէ որ ծրագիրին որքան գումար պիտի յատկացուի»,-նշեց մեր զրուցակիցը: Ինչ կը վերաբերի խօսակցութիւններուն, թէ Գըրգ Գըրգորեան նեղացած է Հայաստանէն ու այդ պատճառով դադրեցուցած «Լինսի» հիմնադրամի գործունէութիւնը, ապա Յարութ Սասունեան ատոնք որակեց սուտ ու կեղծիք: Ան նշեց, որ Գըրգ Գըրգորեան պատճառ չունէր նեղանալու, իսկ կատարուած էր աշխատանք, որմէ ան  գոհ էր: 2015 թուականի Յունիս 16-ին 98 տարեկանին կեանքէն հեռացած է ամերիկահայ գործարար, միլիարատէր, բարերար Գըրգ Գըրգորեան:

Ան ծնած է 1917թ. Յունիս 6-ին Ֆրեզնօ քաղաքին մէջ: Աշխատած  է հիւրանոցային շինարարութեամբ, ֆիլմի եւ ինքնաշարժներու արտադրութեամբ: Սպիտակի երկրաշարժէն ետք եւ ՀՀ շրջափակման ու տնտեսական ճգնաժամի տարիներուն «Հայաստան» համահայկական հիմնադրամի տարբեր ծրագիրներուն նուիրաբերած է աւելի քան 20 մլն տոլար: 1996թ. կրկնապատկած է Լոս Անճելըսի հեռուստամարաթօնի ընթացքին հաւաքուած գումարը` Գորիս-Ստեփանակերտ ճանապարհի շինարարութեան յատկացնելով մօտ 4 մլն տոլար:

2001-էն անոր  «Լինսի» հիմնադրամը 200 մլն տոլարի արժողութեան ծրագիրներ  իրականացուցած է ՀՀ-ի մէջ ճանապարհներու վերակառուցման, մշակութային հաստատութիւններու նորոգման, աղէտի գօտիի վերականգնման ուղղութեամբ: Հայաստանի Ազգային հերոս է: Պարգեւատրուած է «Հայրենիք» շքանշանով: