Փետրուարը Մոսկուայի «Հայորդաց տան» մէջ յայտարարուած է իբրեւ Մայրենիի միամսեակ, որուն ծիրէն ներս կը կայանան համադպրոցական եւ դասարանական ձեռնարկներ, կ’իրականացուի մայրենիին նուիրուած բանաստեղծութիւններու եւ շարադրութիւններու մրցոյթ: Այս մասին «Հայորդաց տան» տեղեկատուական կեդրոնի փոխանցմամբ`  Փետրուար 7-ին յայտարարելով միամսեակի բացման մասին` ըսաւ հայոց լեզուի ուսուցչուհի Սուետլանա Միքայէլեան:

Կրթօճախէն ներս Փետրուարը Մայրենիի միամսեակ յայտարարելը արդէն աւանդոյթ դարձած է: Ամիսը պատահական չէ ընտրուած․ 2000 թ․-ի Փետրուարի 21-ին ԵՈՒՆԵՍԿՕ-ն այդ օրը հռչակած է Մայրենիի միջազգային օր:

Սաներուն ողջունելուն, հայոց տառերու ստեղծման եւ նշանակութեան մասին պատմելէ ետք Սուետլանա Միքայէլեան ներկայացուց ասոյթներ հայոց լեզուի մասին, ապա սաներուն ցուցադրուեցաւ Օշականի եւ Մեսրոպ Մաշտոցի մասին պատմող ֆիլմ:

«Հայոց տառերը սրի եւ վահանի պէս պահպանել են հայ ժողովրդին ոչնչացումից ու ձուլումից: Այսօր այդ խնդիրը նաեւ ձեր առջեւ է ծառացել: Հէնց այդ կործանումը թոյլ չտալու համար է շուրջ տասը տարի գործում «Հայորդեաց տունը»: Պատմութիւնից ձեզ յայտնի է, որ հայ հոգեւարականը հայ գրի առաջին պահապանն է եղել: Այսօր էլ մայրենին օտար հողում պահպանելու առաքելութիւնն իր վրա  է կրում մեր ՀԱԵ Սուրբ եկեղեցին: Նա նեցուկ եւ ապաւէն է, որպէսզի հայ զաւակը հայ մեծանայ եւ հաղորդակից լինի նախնիների լեզուին ու պատմութեանը»,- ֆիլմի ցուցադրութենէն ետք ըսաւ Սուետլանա Միքայէլեան:

Միամսեակի ծիրէն ներս իւրաքանչիւր կիրակի ծրագրուած է իրականացնել բաց-դասեր, մրցոյթներ, հայոց լեզուին նուիրուած ձեռնարկներ: Իսկ սաներու` մայրենիին նուիրուած լաւագոյն ստեղծագործութիւնները պիտի տպագրուին: