Թուրք-սուրիական սահմանի մօտակայքը ռուսական Սու-24 ինքնաթիռի խոցումէն յետոյ թրքական լրատուամիջոցներուն մէջ կը շարունակեն գրել ու քննարկել Թուրքիոյ դէմ ՌԴ ձեռնարկելիք հնարաւոր քայլերուն, հնարաւոր պատժամիջոցներուն մասին:

Թրքական «Միլլիյէթ» պարբերականը անդրադարձած է մինչ այժմ Ռուսաստանի իրականացուցած 6 քայլերուն, ներառեալ` Հայոց ցեղասպանութեան մասին բանաձեւի քննարկման:

Անդրադարձը tert.am-ը կը ներկայացնէ մասնակի կրճատումներով.

«Ռուսաստան մինչ այժմ 6 քայլ  իրականացուցած է: Մասնագէտները կը նշեն, որ Ռուսաստան ոչ թէ ուղիղ, այլ կողմնակի հարուածներ կը հասցնէ:

Թուրքիոյ դէմ 6-րդ քայլը առնուած է  այսօր` Թուրքիայէն ներմուծուող մթերքի նկատմամբ վերահսկողութիւնը  ուժեղացուած է:

Եւ այսպէս.

1. Թուրքիա չմեկնելու կոչ

Ռուսաստանի ԱԳ նախարար Սերգէյ Լաւրով Թուրքիա այցը չեղարկեց, ռուսաստանցիներուն  կոչ ըրաւ չայցելել Թուրքիա: Լաւրով նշած է, որ Թուրքիան ապահով երկիր չէ Ռուսաստանի քաղաքացիներուն համար: Նմանատիպ յայտարարութիւն ըրաւ նաեւ ՌԴ նախագահ Վլատիմիր Փութին:

2. С-300 համակարգերու ուղարկում տարածաշրջան

Ռուսական ինքնաթիռի կործանումէն յետոյ Սուրիոյ շրջանին մօտեցան C-300 հրթիռներ տեղափոխող նաւեր: Բացի այդ, յայտարարուեցաւ, որ Ռուսաստան Սուրիոյ մէջ գործող օդակայանին C- 400 եւ C-300 համակարգեր պիտի ուղարկէ:

3. Աւելի մեծ թիւով օդային գործողութիւններ սահմանին

Գրեմլը յայտարարեց, որ սահմանին օդային գործողութիւնները պիտի շարունակէ: ՌԴ պաշտպանութեան նախարար Սերգէյ Շոյկուն  նշեց, որ այդ շրջանին մէջ գործողութիւններ իրականացնող ռմբակոծիչներուն պիտի ուղեկցին օդին մէջ կրակ բանալու հնարաւորութիւն ունեցող ինքնաթիռներ:

4. Հայոց ցեղասպանութեան մասին բանաձեւ` խորհրդարանէն ներս

Ռուս պատգամաւորները 1915-ի դէպքերը Հայոց ցեղասպանութիւն չհամարողներուն պատժելու ուղղութեամբ օրինագիծ ներկայացուցին խորհրդարան: Ռուս ընդդիմադիր Ալեքսէյ Նաւալնին ալ նշեց, որ ժխտումը քրէականացնող օրինագիծը պիտի ցաւցնէ Թուրքիոյ:

5. Թռչնամիսի ներմուծման արգելք

Ռուսաստան Դեկտեմբեր մէկէն կը կասեցնէ Թուրքիայէն թռչնամիսի ներմուծումը:

6. Ռուսական կառավարութիւնը վճռեց Թուրքիայէն ներմուծուող մթերքի վերահսկողութիւնը խստացնել: