Մահացած է սիրուած դերասանուհի Վարդուհի Վարդերեսեանը: Այս մասին կը գուժեն ՀՀ մշակոյթի նախարարութենէն՝ նշելով, որ դերասանուհին եղած է վատառողջ։

Հոգեհանգստի, յուղարկաւորութեան տեղի ու ժամի մասին տակաւին յստակ տեղեկութիւններ չկան:

«Այս պահին ճշտումներ են արւում, քիչ անց բօթը կը տեղադրենք նախարարութեան պաշտօնական էջում»,- յայտնած են  նախարարութենէն:

Վարդուհի Վարդերեսեան ծնած էր 1928թ. Մարտ 19-ին, Ռումանիոյ մայրաքաղաք Պուխարեսթի մէջ: Եղած է դերասան, թատերագէտ Գէորգ Ապաճեանի կինը: 1946թ. տեղափոխուել է Հայաստան: Առաջին բեմելը եղած է Նուբարաշենի ինքնագործ թատրոնին մէջ: 1947թ. ընդունուած է Լենինականի դրամատիկական թատրոնին կից արուեստանոց եւ նոյն թուականէն խաղացած է թատրոնի մէջ: 1958թ-ին տեղափոխուած է Երեւանի Սունդուկեանի անուան թատրոն:

Կերտած է բազմաթիւ դերեր թատրոնի մէջ` Շիրվանզադէի «Պատուի համար»` Մարգարիտ, Չեխովի «Բալենու այգի»` Ռանեւսգայա, Տիւրենմաթի «Ծեր տիկնոջ այցը»` Քլերի Ցախնասեան, Սարոյեանի «Իմ սիրտը լեռներում է»` Ճոնի, Շանթի «Հին աստուածները»` Իշխանուհի եւ այլն: Խաղացած է նաեւ արեւմտահայ դերերու մէջ` «Պաղդասար Աղբար»` Անոյշ եւ այլն: Նկարահանուած է «Պատուի համար», «Մօր սիրտը», «Ճանապարհ դէպի կրկէս», «Հայրիկ», «Կարինէ» եւ այլ ֆիլմերու մէջ: Հայաստանի Ազգային ռատիոյի ոսկէ ֆոնտին մէջ ունի աւելի քան 100 ձայնագրութիւն: 1958թ-էն նկարահանուած է հեռուստաներկայացումներու մէջ, ի դէպ` եղած է առաջին հեռուստաներկայացման դերասանուհիներէն:

1985թ. հրաւիրուած է Սուրիոյ Հալէպ քաղաքի «Ադամեան» թատրոն, ուր արժանացած է ոսկէ մետալի: Ստացած է բազմաթիւ պետական բարձրագոյն պատուոգրեր, մրցանակներ, շնորհակալագրեր: 1965թ. արժանացած է ՀԽՍՀ, 1988թ.` ԽՍՀՄ ժողովրդական արտիստի կոչման: 1995թ. պարգեւատրուած է ՀՀ «Մովսէս Խորենացի» մետալով, 2001թ.` Երեւանի պատուաւոր քաղաքացիի կոչումով, 2013թ.` ՀՀ «Մեսրոպ Մաշտոց» շքանշանով: