«Ֆրեսքօ». Կոտրելով Պնդագլուխները, Սերմանելով Համամարդկային Արժէքներ

Մենք կ’ապրինք  ժամանակաշրջանի մը մէջ, երբ հոգեւորը, մարդասիրական արժէքներն ու քրիստոնէական մտածողութիւնը օրէօր դուրս կը մղուին մեր առօրեայէն ու կենցաղէն` դառնալով վերացական ու ոչ գործարանական: Մեր հանրութեան  ստուար զանգուածի մը համար հոգեւորը կը սկսի եւ կ’աւարտի լոկ եկեղեցւոյ պատերէն ներս:
Եթէ ինչ-որ ժամանակ արուեստը միտուած էր մարդոց մղելու դէպի մարդկայինն ու մարդասիրականը, վեհն ու կատարեալը, ապա այսօր  հէնց նոյն արուեստի միջոցով շատ յաճախ մարդոց հոգեպէս կը ստրկացնեն` դարձնելով հոգեւոր ու համամարդկային արժէքներէ զուրկ խամաճիկներ:
«Ֆրեսկօ» (որմնանկարի տեսակ, իտալ. «fresco». բառացի կը նշանակէ թարմ) անուանումը ստացած կինոփառատօնի նոր ձեւաչափը կու գայ փոխելու ստեղծուած իրականութիւնը` կոտրելով փառատօններու մասին եղած բոլոր պատկերացումները, թարմութիւն ու նոր շունչ բերելով հայ հանրութեան:
Աշխարհի տարբեր անկիւններէ բերուած շարժանկարները, որոնք իրենց մէջ կը պարունակեն մարդասիրական ուղերձ, կը սերմանեն խաղաղութիւն ու հանդուրժողականութիւն, սէր ու առողջ արժէքներ,  քանի մը օրերու ընթացքին կը դառնան հայ ժողովուրդի առօրեայի կարեւոր մասնիկը:
«Ֆրեսկոն» կը նախատեսուի դառնալ սահմաններէն ու սահմանումներէն դուրս  իրադարձութիւն մը, որ տանիքի մը տակ կը հաւաքէ համաշխարհային կինոգործիչներու, հոգեւորականներու ու հոգեբաններու, շարժանկարներուն մէջ բարձրաձայնուած տարբեր խնդիրներու առնչուող մասնագէտներու: Կինոդիտումներէն անմիջապէս ետք կը կազմակերպուին աշխոյժ ու անկաշկադ քննարկումներ` նպաստելով շարժանկարներու մէջ արծարծուած առողջ գաղափարներու ամրացման, բարձրաձայնուած խնդիրներու լուծման:
Մենք կարեւոր խնդիր ունինք. այսօր բոլոր փառատօններն ու մշակութային ծրագիրները կ’իրականացուին գերազանցապէս մայրաքաղաք Երեւանի մէջ. հետեւաբար մարզերու բնակչութիւնը պարզապէս կտրուած կը մնայ հոգեւոր ու մշակութային զարգացումէն: «Ֆրեսկօ» կինոփառատօնի ծիրէն ներս կը կազմակերպուին նախադէպը չունեցող կինոարշաւներ հանրապետութեան տարբեր գեղատեսիլ ու գողտրիկ վայրեր` նպաստելով տեղի պատմամշակութային արժէքներու  ճանաչմանն ու բնակչութեան  հոգեւոր մտածողութեան աճին:
Փառատօնը մեծ կարեւորութիւն կու տայ նաեւ հասարակական յատուկ խումբերու ու սահմանափակ կարողութիւններով անձանց մասնակցութեան: Այսպիսով, հաշմադամութիւն ունեցող անձիք ոչ միայն կը մասնակցին փառատօնի բոլոր ձեռնարկներուն, այլեւ կ’ընդգրկուին կազմակերպչական աշխատանքներուն:
«Ֆրեսկոն» կու գայ ապացուցելու, որ քրիստոնէութիւնը որպէս պետական կրօն առաջին ընդունած ազգը կը շարունակէ մնալ քրիստնէական արժէքներու կրողն ու տարածողը, կը շարունակէ  ըլլալ մարդասէր ու հիւրընկալ, ստեղծագործ ու բաց` կենսարար ու  ճշմարիտ արուեստի առջեւ:
«ֆրեսկոյի» մեկնարկը կը նախատեսուի 2014 թուականի մայիս-յունիս ամսիներուն: Փառատօնը կ’ըլլայ ամենամեայ` տարիէ տարի նպաստելով ստեղծուած հոգեւոր-մշակութային ճգնաժամի յաղթահարման, համամարդկային ու հոգեւոր արժէքներու տարածման ու խորացման, ինչպէս նաեւ ազգային ու քաղաքացիական ինքնագիտակցութեան զարգացման մեր երկրին մէջ:

Անժելա Պօղոսեան

Scroll Up