Յունական gazzetta.gr կայքը Իւեթա Մուկուչեանին «Եւրոտեսիլ­ 2016»­ի ամենագեղեցիկ մասնակիցներէն կը  համարէ: Ինչպէս կը տեղեկացնէ «Արմէնփրէս»­-ը` կայքը հրապարակած է երգչուհիի լուսանկարներու մեծ շարք մը:

«Հայաստան «Եւրոտեսիլ-­2016»­ ին կը ներկայացնէ Իւա Մուկուչեան, որ այս պահուն մրցոյթի ամենագեղեցիկ մասնակիցն է: Իսկապէս հիասքանչ հայ երգչուհի է,­ աւելցուցած է կայքը: Հոկտեմբեր 13-­ին յայտնի  դարձած է «Եւրոտեսիլ­-2016»-­ի հայաստանեան մասնակիցին անունը: Եւրոպական ամենայայտնի երաժշտական ծրագիրին Հայաստան կը ներկայացնէ Իւեթա Մուկուչեան: «Եւրոտեսիլ»­ի այս տարուան պատուիրակի գլխաւոր ցանկութիւնը եւրոպական բեմին վրայ հայկական ջերմութիւնը եւ եւրոպական շունչը համատեղ ներկայացնելն է:

«Այնչափ ուրախ եմ եւ շնորհակալ Հանրային հեռուստաընկերութեան, որուն կողմէ ընտրուած եմ ներկայացնելու իմ հայրենիքս այս տարի Եւրոտեսիլին: Իւրաքանչիւրիդ ամէն խօսքն ու կարծիքը ինծի այնչափ կ’ոգեւորէ եւ ուժ կու տայ: Յոյսով եմ, կ’ըլլաք կողքիս այս պատասխանատու եւ կարեւոր ճանապարհին,­ աւելի առաջ նշած է Իւեթա Մուկուչեան:

Իւեթա Մուկուչեան ծնած է 1986­-ին Հայաստան: 5 տարեկանէն անոր ընտանիքը տեղափոխուած է Գերմանիա, սակայն 20 տարի այնտեղ ապրելէ յետոյ, Իւեթան որոշում  կայացուցած է վերադառնալ իր արմատներուն` Հայաստան:  Ան յաճախած է Երեւանի Կոմիտասի անուան պետական երաժշտանոցը: Ուսման տարիներուն ալ hասկցած է, որ իր ինքնադրսեւորման հիմնական միջոցը եւ կոչումը երաժշտութիւնը պէտք է ըլլայ:

2012­-ին մասնակցած է «Գերմանիոյ ձայնը» նախագիծին: Քրտնաջան աշխատանքի արդիւնքով այսօր Իւեթան արդէն ճանչցուած երգչուհի է, ինչպէս նաեւ  շարք մը երգերու հեղինակ, որ զուգահեռաբար գործունէութիւն կը ծաւալէ Հայաստանի եւ Գերմանիոյ մէջ: Իր իսկ բնութագրմամբ` «Գերմանացիի պէս կը մտածեմ , հայու պէս կը սիրեմ»: