Եթէ Թուրքիոյ քաղաքացիական հասարակութիւնը բաւական ուժեղ գտնուի, ճանչնայ Ցեղասպանութիւնը եւ աշխատի այդ ուղղութեամբ, ապա որեւէ կառավարութիւն, այսպէս թէ այնպէս, ստիպուած կ’ըլլայ նահանջելու:

Այս մասին Սեպտեմբեր 22-ին` հայ-թրքական հաշտեցման «Գործելով միասին» ծրագիրի առաջին փուլին նուիրուած մամլոյ ասուլիսին ժամանակ, յայտարարած է  DVV International կազմակերպութեան թուրք ներկայացուցիչ Այշէ Օքթեմ, կը գրէ News.am-ը:

 Ան նշած է, որ Թուրքիայէն նախագիծին կը մասնակցին թուրք եւ քիւրտ ներկայացուցիչներ: Օքթեմ յոյս  յայտնած է, որ Գերմանիան նոյնպէս կը ճանչնայ Հայոց ցեղասպանութիւնը: «Ես յոյս ունիմ նաեւ, որ Թուրքիոյ կողմէ Հայոց ցեղասպանութեան ճանաչումը չըլլար արտաքին ուժերու ճնշման հետեւանք, այլ կը բխի ներսէն, Թուրքիոյ ժողովուրդէն»,- աւելցուցած է Այշէ Օքթեմ:

Նշենք, որ նախագիծը կը ֆինանսաւորէ Գերմանիոյ ԱԳՆ-ը: