Թուրքիոյ Մուշի նահանգին մէջ պայթեցուած է Էլազըղ – Թաթուան երթուղիի բեռնատար շոգեկառքը, որուն հետեւանքով 3 մարդ  վիրաւորուած է: Թրքական «İhlas» լրատուական գործակալութեան տեղեկութեան համաձայն` Մուշի Քորքութ շրջանով անցնող շոգեկառքը պայթեցուած է երկաթուղիին մէջ նախօրօք տեղադրուած ռումբի օգնութեամբ, որ գործարկուած է շոգեկառքի անցնելու պահուն, կը գրէ ermenihaber.am-ը: Կ’ենթադրուի, որ ռումբերը տեղադրուած են «Քիւրտիստանի բանուորական կուսակցութիւն» (ՔԲԿ – PKK) անդամ զինեալներուն կողմէ:

Պայթիւնէն յետոյ դէպքի վայր ժամանած շտապօգնութեան մեքենաները վիրաւորներուն տեղափոխած են Մուշի հիւանանդանոց: Յայտնի է, որ վիրաւորուածները շոգեկառքի անվտանգութեան աշխատակիցներն են, անոնց կեանքին վտանգ չի սպառնար:

Պայթիւնէն վնասուած  շոգեկառքի տարածքին մէջ անվտանգութեան ուժերը յատուկ գործողութիւն  սկսած են` յանցագործութիւնը բացայայտելու նպատակով: