Յուլիս 15-ին ՀՀ սփիւռքի նախարար Հրանոյշ Յակոբեան ընդունեց Փարիզի մէջ հրատարակուող «Նոււէլ տէ Արմէնի» պարբերականի գլխաւոր խմբագիր, ֆրանսահայ կազմակերպութիւններու միութեան համանախագահ Արա Թորանեանը:

 Զրոյցին ընթացքին կարեւոր համարուեցաւ մամուլի դերը` հայութեան առջեւ ծառացած մարտահրաւէրները դիմագրաւելու, համազգային գերակայ խնդիրները վեր հանելու,  հայութիւնը համախմբելու եւ ազգային ինքնութիւնն ու միասնականութիւնը պահպանելու ճանապարհին:

 Նախարարը հիւրին ծանօթացուց սփիւռքի նախարարութեան գործառոյթներուն եւ  ծրագիրներուն` տեղեկացնելով, որ ի թիւս հայրենաճանաչութեան եւ հայոց լեզուի ուսուցման տարբեր ծրագիրներու, կը կազմակերպուին նաեւ դասընթացներ լրագրողներու համար, որուն մասնակիցները Հայաստանի տեսարժան վայրերուն եւ մշակութային ժառանգութեան ծանօթանալէ զատ` կը հանդիպին ՀՀ կառավարութեան անդամներուն, մշակութային եւ հասարակական անուանի գործիչներուն, կը  ծանօթանան տարբեր ոլորտներու ներկայացուցիչներու հետ: Ինչպէս նշեց նախարարը, նման դասընթացներ կ’օգնեն աւելի խորքով ճանչնալ երկիրը եւ աւելի անաչառ ներկայացնել խնդիրները:

 Երկուստեք կարեւոր համարուեցաւ այն իրողութիւնը, որ Հայաստան համայն հայութեան հայրենիքն է, եւ որ ամէն ինչ պէտք է ընել` պահպանելու եւ զարգացնելու երկրի ձեռքբերումները: