Սթամպուլի հայկական մանկատան «Քամփ Արմէն» անունով յայտնի ամառնային
ճամբարի շէնքը, որ յայտնուած էր քանդումի վտանգին տակ, արդէն փրկուած
է: Թուրքիոյ հայկական «Ակօս» թերթի վկայութեամբ` շինութեան ներկայիս
սեփականատէրը յայտարարած է, որ կը պատրաստուի մանկատունը նուիրաբերել
Կետիք փաշայի հայկական բողոքական եկեղեցւոյ հիմնադրամին, կը գրէ
ermenihaber.am-ը:

Մանկատան քանդման դէմ աշխուժրէն պայքարող Թուրքիոյ «Dֆşֆnce
Platformu» («Գաղափարական հարթակ») միութեան ներկայացուցիչ Յարութ Օզերը
թեմային շուրջ մեկնաբանութիւններ ըրած է թրքական «ճzgֆr Radyo»-ի
«Ռատիօ Ակօս» ծրագիրի եթերով:

Ան նշած է, որ Արմէն ճամբարի` հայկական կողմ վերադարձին համար
հանդիպումներ  ունեցած են Սթամպուլի Թուզլայի շրջանի ղեկավար Շատի
Եազըճըն, Թուրքիոյ իշխող «Արդարութիւն եւ զարգացում» կուսակցութեան (ԱԶԿ
– AKP) պատգամաւորի թեկնածու հայազգի Մարգար Եսայեանը, հիմնադրամի
փաստաբան Սեպու Ասլանկիլը եւ «Dֆşֆnce Platformu»- ի ներկայացուցիչները:

«Հանդիպումներու արդիւնքով պայմանաւորուածութիւն  ձեռք բերուած է անշարժ
գոյքի սեփականատիրոջ կողմէ  սեփականութեան իրաւունքի նուիրաբերման
շուրջ: Կ’ակնկալենք, որ յառաջիկայ շաբթուան ընթացքին սեփականութեան
փաստաթուղթերը կը յանձնուին» , – ըսած է Յարութ Օզեր:

Իսկ Արմէն ճամբարի շինութեան ներկայիս սեփականատէր Ֆաթիհ Ուլուսոյը
գրաւոր յայտարարութիւն  տարածած է, ուր մասնաւորապէս կ’ըսուի. «Խնդիրի
լուծման վերաբերեալ վարչապետ Ահմեթ Տաւութօղլուի խնդրանքն ու
յանձնարարութիւնը,  Սթամպուլի քաղաքապետ Քատիր Թօփպաշին, ԱԶԿ-ի
Սթամպուլի տարածքային ղեկավար Սէլիմ Թեմուրջին եւ Թուզլայի տարածքային
ղեկավար Շատի Եազըճըն  համոզեցին ինծի: Մեր օրերուն, երբ ամէն կերպ փորձ կ’ըլլայ հրահրելու մեր հասարակութեան դիւրազգացութիւնը`  կապուած 1915թ.
դէպքերուն հետ, մեր հայ քաղաքացիներու մտքի եւ զգացմուներու խաղաղութեան,
մեր երկրի սոցիալական համերաշխութեան մէջ ներդրում ունենալու նպատակով`
ամենայն յարգանքով կը յայտարարեմ մեր հանրութեան, որ խնդրոյ առարկայ
տարածքը պիտի նուիրաբերեմ Կետիք փաշայի հայկական բողոքական եկեղեցւոյ
հիմնադրամին»:

Յիշեցնենք, որ «Քամփ Արմէն» հայկական ճամբարը Սթամպուլի Թուզլա շրջանին մէջ
գտնուող, երէկ լքուած, այսօր արդէն կիսաքանդ  շինութիւն մըն է: Ներկայիս
աւերակի վերածուած շինութիւնը ժամանակին  եղած է չքաւոր ու որբ հայ
երեխաներու ամառնային ճամբարը: 5.552 քմ տարածք ունեցող «Քամփ Արմէնը» 1961
թուականին գնուած է Հայ բողոքական եկեղեցւոյ հիմնադրամին կողմէ եւ ծառայած է
իբրեւ ամառնային ճամբար` Կետիկ փաշայի հայկական դպրոցի չքաւոր ու որբ
սաներուն համար: Յայտնի է, որ այստեղ մեծցած են նաեւ 2007թ. Թուրքիոյ մէջ սպաննուած յայտնի հայ լրագրող Հրանդ Տինքը եւ անոր կին Ռաքէլ Տինքը:

2015 Մայիս 6-ի առաւօտեան ճամբարի ներկայիս սեփականատիրոջ
նախաձեռնութեամբ սկսած էր  ճամբար-մանկատան քանդումը, սակայն կարճ
ժամանակ անց Թուրքիոյ հայկական համայնքի սկսած բողոքի լայնածաւալ
ձեռնարկներուն շնորհիւ շինութեան քանդումը ժամանակաւորապէս
դադրեցուած էր: