Սիրելի Բարեկամներ, հարազաներ ու ընկերներ՝ Երկա՜ր եւ հեւքոտ վազքէ ետք, տքնաջան աշխատանքի իբր արդար արդիւնք, կու գանք տեղեկացնելու, որ Արիս Պապիկեան կրցաւ ապահովել մեծն Թորոնթոյի Scarborough-Agincourt –ի ընտրաշրջանի MPP նահանգային երեսփոխանի աթոռը:

Երէկ գիշեր խուրներամ համակիրներու եւ հայորդիներու ներկայութեամբ, հետեւեցանք պաստառին վրայ վայրկեանը վայրկեանին թաւալող թուանշաններուն, եւ Հուռա՜-Հուռա բացականչութիւններով ու ծափողջիւններով Թորոնթոյի Հայ Կեդրոնը հաւաքուած զանգուածը ապրեցաւ ցնծութեան եւ հպարտութեան պահեր ի տես այս իրագործումին:

Օտար ափերու մէջ քաղաքական նուաճում արձանագրելը, հպարտանք կը պատճառէ բոլորիս: Արիս ջախջախիչ յաղթանակ արձանագրեց իր մրցակիցներուն վրայ: Այս մէկը իրականացաւ՝ շնորհիւ Արիսի տարիներու վրայ ձեռք բերած քաղաքական կեանքի փորձառութեան եւ իր անդուլ, հետեւողական աշխատանքին: Անշուշտ կարելի չէ աչքաթող ընել, այն մեծ ներդրումը որ ունեցաւ հայկական գաղութը, իր զանազան շերտաւորումներով: Մասնաւորաբար պէտք է ընդգծել հաւաքական աշխատանքի արգասիքը, որ դրսեւորուեցաւ կամաւոր աշխատողներու հոծ փաղանգի նուիրական ճիգերով ու զոհողութիւններով, որուն իբր արդիւնք հասանք այս պատուաբեր պատկերին ու շռնթալից յաղթանակին: Կը մնայ յաջող երթ մաղթել նորընտիր երեսփոխանին՝ Արիս Պապիկեանին, որ գալիք 4 տարիներու վրայ երկարած իր ծառայութիւններով, արժանաւոր արդիւնքներով տանի իրեն վստահուած նոր պետական պատասխանատւութիւնը ու արժանաւոր թարգմանը հանդիսանայ հայ գաղութի զանազան կարիքներուն: Պատիւ բոլոր աջակիցներուն: Մնացէ՛ք միշտ առոյգ ու ներգործօն գաղութային կեանքին մէջ:

Ջերմօրէն՝ Ժան Հալլաճեան