«Թանգարաններու գիշեր» ծրագիրին ծիրէն ներս՝ Ռուբէն Սեւակի թանգարանին մէջ ցուցադրութեան պիտի դրուի Հայոց Ցեղասպանութեան նահատակներու Սրբադասման առիթով ստեղծուած «Սրբոց Նահատակաց» սրբապատկերը, որուն հեղինակն է Տիգրան Բարխանաջեան: Այս մասին կը տեղեկանանք «Թանգարանների գիշերը Մայր Աթոռ Սուրբ Էջմիածնում» Facebook-եան էջէն։

«Թանգարանների գիշեր-2015» ծրագիրը պիտի իրականացուի Մայիս 16-ին: Հայաստանի բոլոր 110 թանգարաններ պիտի միանան ծրագիրին, որուն մասնակցութիւնը անվճար է եւ բաց է մինչեւ կէս գիշեր:

Մայր Աթոռի մէջ, «Թանգարանային գիշեր» ծրագիրին առիթով, բաց պիտի ըլլան Սբ Էջմիածինի Մայր Տաճարի աւանդատուն-թանգարանը եւ Ռուբէն Սեւակի թանգարանը:

Ռուբէն Սեւակի թանգարանին մէջ պիտի ըլլան բանախօսութիւն «Պատմամշակութային արժէքների ժողովում Մայր Աթոռ Սուրբ Էջմիածնում Մեծ Եղեռնի օրերին» թեմայով (բանախօս` Մայր Աթոռի Թանգարաններու եւ Արխիւի տնօրէն Տ. Ասողիկ քահանայ Կարապետեան), այնուհետեւ երգեհոնային համերգ Մայր Տաճարին մէջ (երգեհոնահար` Թերեզա Ոսկանեան):