Կանադայի առևտրային առաքելությունը Հայաստանում է, այցի շրջանակում կայացել է շուրջ 160 երկկողմ հանդիպում հայ և կանադացի գործարարների միջև:

Առաքելության այցը Հայաստան կազմակերպել են Հայաստանի զարգացման հիմնադրամը, Հայաստանի արդյունաբերողների և գործարարների (գործատուների) Միությունը, Հայաստանում Կանադայի դեսպանությունը: Այս մասին հայտնում են Հայաստանի զարգացման հիմնադրամից:

Մարտի 16­ին «Արմենիա Մարիոթ» հյուրանոցում տեղի է ունեցել հայ­կանադական գործարար համաժողով, որի շրջանակում ներկայացվել են Հայաստանի ներդրումային միջավայրի, ՀՀ­ում գործող ազատ տնտեսական գոտիների, հանքարդյունաբերության, հեռահաղորդակցության և ինտերնետային կարգավորումների, գյուղատնտեսության և ագրովերամշակող արդյունաբերության վերաբերյալ ոլորտային շնորհանդեսներ: Հայ և կանադացի գործարարների հանդիպումներ են կայացել սննդի վերամշակման (մսամթերքի վերամշակում), հանքարդյունաբերության, տեղեկատվական և հաղորդակցության տեխնոլոգիաների, տրանսպորտի, լոգիստիկայի, իրավաբանական և խորհրդատվական ծառայությունների մատուցման և այլ ոլորտներում հնարավոր համագործակցության հեռանկարները քննարկելու նպատակով: Միջոցառումը միտված է դառնալ հարթակ երկու մեր երկրների բարեկամական հարաբերությունների խթանման, գործարարների միջև առևտրատնտեսական հարաբերությունների ամրապնդման և ընդլայնման, նոր գործարար հարաբերությունների ձևավորման և հետագա զարգացման համար: Միջոցառումները մեկնարկել են մարտի 15­ին և կավարտվեն մարտի 18-­ին: