ԱՄԵՐԻԿԱՅԻ ՀԱՅԿԱԿԱՆ ՀԱՄԱԳՈՒՄԱՐԻ

ՊԱՏՎԱՎՈՐ ՆԱԽԱԳԱՀ ՀՐԱՅՐ ՀՈՎՆԱՆՅԱՆԻՆ

Հարգելի պարոն Հովնանյան,

Ընդունեք իմ ջերմ շնորհավորանքները Համագումարի պատվավոր նախագահ ընտրվելու առիթով, որը Ձեր արդյունավետ գործունեության և ազգանվեր կյանքի լավագույն գնահատականն է:

Ձեր նախագահությամբ «Ամերիկայի հայկական համագումարը» ավելի քան չորս տասնամյակ ազգային գաղափարների շուրջ համախմբելով ամերիկահայերին`  սատարեց ԱՄՆ-ում հայ ազգային ինքնության զարգացմանը, ամերիկահայերի շահերի ու իրավունքների պաշտպանությանը, ՀՀ անկախությունից ի վեր` Հայաստանում և Արցախում տնտեսական և մարդասիրական աջակցության կազմակերպմանը:

Հիրավի, հայամետ կոնգրեսականների միջոցով ռազմավարական նշանակության խնդիրները Միացյալ Նահանգների Կոնգրեսում ներկայացնելով և ներազդելով հայանպաստ բանաձևերի ընդունման վրա` լոբբիստական Ձեր կառույցը եղել և մնում է Հայաստանի և Արցախի հուսալի դաշնակիցը ամերիկյան քաղաքական շրջանակներում:

ԱՄՆ-ի Կոնգրեսի և վարչակազմի անդամների հետ կազմակերպության ամենօրյա աշխատանքն էլ ավելի է կարևորվում Հայոց ցեղասպանության 100-րդ տարելիցի նախաշեմին: Հայոց ցեղասպանության ճանաչման և միջազգայնացման ուղղությամբ տարվող աշխատանքներում համագործակցելով բոլոր ազդեցիկ ուժերի հետ իրականացնում եք համազգային գաղափարների շուրջ հայության համախմբման ազգանպաստ ծրագիրը՝ հանուն Սփյուռքի, Հայաստանի և Արցախի բարօրության: Անգնահատելի է Ձեր կառույցի ջանքերը ԼՂՀ-ի հիմնախնդրի կարգավորման շուրջ ԱՄՆ-ում հայանպաստ դիրքորոշման ձևավորման գործում:

Շնորհավորում եմ նաև «Ամերիկայի հայկական համագումարի» համանախագահներ Անտոնի Բարսամյանին և Վան Կրիկորյանին, որոնք իրենց անմնացորդ նվիրումով միշտ էլ իրենց նպաստն են բերել կառույցի կայացման և զորացման գործում:

Օգտվելով առիթից, որ այս օրերին Համագումարը Ֆլորիդայում անցկացնում է իր ամենամյա հոգաբարձուների խորհրդի անդամների հանդիպումը և քննարկելու է Հայոց ցեղասպանության 100-րդ տարելիցին նվիրված միջոցառումները` մաղթում եմ Ձեզ, Հոգաբարձուների խորհրդի նորընտիր համանախագահներին, կառույցի բոլոր անդամներին հաջողություն և ձեռքբերումներ, հաղթանակներ` համազգային իղձերի իրականացման ճանապարհին:

Հարգելի պարոն Հովնանյան, ճիշտ է, Ձեզ գրելու առիթը Ձեր` պատվավոր նախագահի, և համանախագահների ընտրությունն է, բայց ես չէի կարող չանդրադառնալ բարերարությամբ հարուստ հայ ժողովրդի կյանքում նաև Հովնանյան ընտանիքի աննախադեպ բարեգործական առաքելությանը:

Վստահ ենք, որ Ձեր կողմից հիմնած «Հրայր և Աննա Հովնանյան» հիմնադրամը լինելու է շարունակական և տևական` ծառայելով ազգային կյանքի վերելքին և հայ մշակույթի զարգացմանն ու տարածմանը:

Կարևորում եմ հիմնադրամի համազգային նշանակությունը, հատկացումների ուղղությունները թե Հայրենիքում, և թե Սփյուռքում` մարդասիրական, կրթական, հոգևոր, գիտական և մշակութային ոլորտների ներդրումները` միտված հայոց կյանքի  բարելավմանը և վերելքին, որ կամրջում է Հայրենիք-Սփյուռք հոգևոր և մշակութային կապերը:

Ձեր բարերարությամբ Երևանի սրտում վեր խոյացող Սուրբ Աննա եկեղեցին Հայոց Եկեղեցու հանդեպ Ձեր ունեցած պակառանքի ինչպես նաև Ձեր` բարերարի ճշմարիտ կերպարի խոսուն վկայություններից է:

Մաղթում եմ Ձեզ, Ձեր զավակներին, Ձեր տիկինոջը` տիկին Աննային, ազնվազարմ հայուհուն` առողջություն և երկարակեցություն, նոր նպատակների և հայրենանվեր ձեռնարկների իրականացում: