Պարագվայցի գրող, պատմաբան և ճարտարապետ Խորխե Ռուբիանին անդրադարձել է Հայոց ցեղասպանության թեմային: Ռուբիանիի հոդվածը, որը հրապարակվել է Genocidoarmenio բլոգի՝ Հայոց ցեղասպանության 100-րդ տարելիցին նվիրված իսպանախոս մտավորականների հոդվածաշարում, armeniangenocide100.org-ը ներկայացնում  է որոշ կրճատումներով.

Ապրիլի 24-ին լրանում է Հայոց հոլոքոստի հարյուրամյա տարելիցը: 1915 թվականի այդ նույն օրը   թուրքական կառավարությունը ձերբակալեց հայ համայնքի 235 անդամի: Այն շարունակվեց հաջորդող օրերի, ամիսների ու տարիների ընթացքում և, տարածվելով հայերի նախնյաց բնակավայրերում, ուղեկցվեց ձերբակալություններով, հալածանքներով և տղամարդկանց, կանանց ու երեխաների սպանություններով: Թեև նախորդ դարում թուրքերն արդեն հայ քաղաքացիներին կոտորածներ իրականացրել էին, հենց ապրիլի 24-ը դարձավ համակարգված բնաջնջման սկիզբը, որի ժամանակ զոհվեց մոտ երկու միլիոն հայ, բռնագրավվեց և յուրացվեց նրանց ունեցվածքը, ոչնչացվեցին  հազարամյակների   քաղաքակրթության և մշակույթի պատմությունն իրենց մեջ կրող հայոց գյուղերն և քաղաքները:

 Օսմանյան կայսրության իրականացրած վայրագությունները որևէ կապ չունեն պատերազմական գործողությունների հետ, որոնք նկարագրվում են տարբեր աղբյուրներում և որոնց միջով անցել են Ցեղասպանությունը վերապրած հայոց Սփյուռքի ներկայացուցիչները:

 ….Պատմական աղբյուրները ահասարսուռ տեսարաններ են մերկացնում. այրվող տներ` բնակիչների հետ միասին, բռնաբարված ու տանջահար կանայք, գետը նետված երեխաներ: Արևելյան նահանգներում զանգվածային կոտորածները վերապրածները մահանում էին քաղցից կամ՝ հյուծվելով աքսորի ճանապարհին: Մեծ թվով երեխաների, որոնց թիվը հասնում է 100 000-ի, բռնի ուժով խլում էին իրենց ընտանիքներից, որպեսզի կրթեն թուրքական կամ քրդական ընտանիքներում` այլ համոզմունքներով և լեզվով: