Ֆրեզնոյի համալսարանում Հայոց ցեղասպանության վերաբերյալ «Հայոց Ցեղասպանությունը կինոյում. տեսական և համեմատական հեռանկարներ» խորագրով դասախոսությունների շարք է սկսվել, գրում է armeniangenocide100.org-ը:

Ինչպես հաղորդում է Interpress-ը՝ The Collegian-ին հղումով, առաջին դասախոսությունը, որը ներկայացրել է հայագետ, Ֆրեզնոյի պետական համալսարանի պրոֆեսոր, դոկտոր Միրնա Դուզջյանը, տեղի է ունեցել փետրվարի 11-ին: Դասախոսությունը կրում էր «Ցեղասպանությունը որպես այլաբանություն Սերժ Ավեդիքյանի «Chienne d’Histoire» ֆիլմում» վերնագիրը: Վերջինը կարճամետրաժ անիմացիոն ֆիլմ է, որում չի հիշատակվում Հայոց ցեղասպանության մասին: Փոխարենը, ֆիլմում պատկերված է Կոնստանդնուպոլսում թափառող շների վերացումը 1910 թվականին: Ֆիլմը հաղթող է ճանաչվել կարճամետրաժ ֆիլմերի շարքում 2010 թվականի Կաննի կինոփառատոնում: Ավեդիքյանը մտադիր չէր ներկայացնել Հայոց ցեղասպանությունը իր ֆիլմում: Այն մատնանշվել է  ֆիլմի ցուցադրումից հետո, պատմում է Դուզջյանը: «Մարդիկ, որոնք գիտեն Հայոց ցեղասպանության մասին և ուսումնասիրել են այն, կարող էին հստակ տեսնել նմանություն, և դա պարզապես ստիպում է ձեզ ավելի զգացմունքային լինել», – ասում է Մարինե Վարդանյանը՝ Հայ ուսանողական կազմակերպության նախագահը: Ֆիլմը ներկայացնում է ավելի վաղ պատմական իրադարձություններ: Պոլսում 1910 թվականին փողոցները լցված էին թափառող շներով: Նորակազմ կառավարությունը որոշում է արտաքսել շներին քաղաքից հեռու մի ամայի կղզի, որտեղ նրանք սովամահ կլինեին: «Ֆիլմը իսկապես սարսափեցնում է: Ես գիտեմ, որ նրանք մարդիկ չեն: Դրանք շներ են, բայց դուք կարող եք իսկապես զուգահեռներ տեսնել: Այն վայրը, որտեղ նրանք արտաքսում են թափառող շներին, ամայի կղզի է, ինչպես որ Հայոց ցեղասպանության ժամանակ նրանք արտաքսել են մարդկանց դեպի անապատ», – ասում է Վարդանյանը: