Դեկտեմբերի 7-ին Սպիտակի աղետալի երկրաշարժի 26-րդ տարելիցի կապակցությամբ  Նիդերլանդների Մաստրիխտ  քաղաքի Սուրբ Կարապետ եկեղեցում Հոգեհանգստյան կարգ և մոմավառություն  կատարվեց`  ի հիշատակ երկրաշարժի զոհերի:

Սուրբ Կարապետ  եկեղեցու ծխական խորհուրդը այդ  մասին դեռ  նախօրոք էր տեղեկացրել,  այդ պատճառով  բազմաթիվ  մարդիկ էին  եկել իրենց հարգանքը մատուցելու այլ բնակավայրերից:

Երկրաշարժի անմեղ զոհերի հիշատակման արարողությունն սկսվում է  քահանա  Տ․Մաշտոց Բաղդասարյանի և Արտակ Մանուկյանի մատուցած պատարագով: Թեև 26 տարի է  անցել այդ ահասարսուռ  օրվանից,  այնուամենայնիվ շատերի հոգիներում տակավին թարմ էին դեկտեմբերի 7-ի կորուստն ու ցավը,  վիշտն ու մորմոքը, փլուզվող շենքերի տեսարաններն ու տխուր պատկերները, որոնց  հետևանքների  վերացման համար էլի մաքառել  է  պետք:

Հոգեհանգստի կարգին հաջորդում է այս թեմայով բանաստեղծությունների ընթերցումը, որից հետո Սոնա Հովհաննեսը ցուցադրում է  «Անիի ավերակները»   իր  նոր կտավը:   Շնորհալի նկարչուհու ձեռքի գործերից է   տեղի Սուրբ Կարապետ եկեղեցու  խորանի պատկերի նկարազարդումը:  Ի  դեպ,  եկեղեցու  ծխական  խորհուրդը’  Լևոն Սարգիսի գլխավորությամբ, ակտիվ քայլեր է  ձեռնարկում  Սուրբ Կարապետ եկեղեցու  շենքը գնելու  և  լրիվ  հայ  համայնքին  ծառայեցնելու  ուղղությամբ:

Դեկտեմբերի 7-ին, Սպիտակի աղետալի երկրաշարժի 26-րդ տարելիցին  նվիրված  միջոցառումն ավարտվեց մոմավառությամբ’  առ աղոթք  Աստված անմեղ զոհերի հոգիների: