Արևմտահայերեն
Русский
EnglishԴեսպան Չարչօղլյանի հանդիպումները Քուվեյթում
Նոյեմբերի 11-ին Քուվեյթի առողջապահության նախարար, դոկտոր Ալի Սաադ Ալ-Օբեյդին ընդունեց Քուվեյթում ՀՀ դեսպան Ֆադեյ Չարչօղլյանին:
ՀՀ ԱԳՆ մամուլի ծառայության փոխանցմամբ՝ կողմերը քննարկեցին Հայաստանի և Քուվեյթի միջև առողջապահության և բժշկագիտության բնագավառներում համագործակցության ընդլայնման ուղիները:
Դեսպան Չարչօղլյանը կարևորեց Հայաստանի և Քուվեյթի առողջապահության նախարարությունների միջև համագործակցության փաստաթղթի ստորագրումը և նշեց, որ դա նոր լիցք կհաղորդի վերոնշյալ ոլորտում դրական առաջընթացի ապահովմանը:
Անդրադարձ կատարվեց մասնագետների փոխանակման և վերապատրաստման դասընթացների կազմակերպման հեռանկարներին:
Երկուստեք ընդգծվեց առողջապահության բնագավառում գիտական փոխգործակցություն ծավալելու, համատեղ գիտական համաժողովներ կազմակերպելու և դասախոսություններով հանդես գալու, ինչպես նաև տարաբնույթ հարցերի և խնդիրների շուրջ խորհրդատվական տեղեկատվություն փոխանակելու կարևորությունը:
Մինչ այդ, նոյեմբերի 10-ին դեսպան Չարչօղլյանը հանդիպում ունեցավ հայ-քուվեյթյան միջխորհրդարանական բարեկամության խմբի ղեկավար Ֆայսալ Ալ-Շայայի հետ:
Հանդիպման ընթացքում քննարկվեց խորհրդարանական գործակցության ոլորտում ձեռք բերված պայմանավորվածությունների կատարման ընթացքն ու բարձրաստիճան պատվիրակությունների փոխայցելությունների ակտիվացման հնարավորությունները:
