Հոկտեմբերի 17-ին, ՀՀ սփյուռքի նախարար Հրանուշ Հակոբյանն ընդունեց Համաշխարհային հայկական կոնգրեսի և Ռուսաստանի հայերի միության փոխնախագահ Վլադիմիր Աղայանին և ՀՀԿ փոխնախագահ, ՌՀՄ առաջին փոխնախագահ Գեորգի Տեր-Ղազարյանցին:

Հանդիպման ընթացքում հյուրերը ներկայացրեցին «Համաշխարհային հայկական կոնգրեսի և Ռուսաստանի հայերի միության օրեր Հայաստանում և Արցախում» ծրագիրը:

ՀՀ սփյուռքի նախարարը կարևորեց ծրագրի շրջանակներում իրականացված ձեռնարկները, առանձնացնելով ՌՀՄ և ՀՀԿ նախագահ Արա Աբրահամյանի  ֆինանսավորմամբ՝ Ստեփանակերտի թիվ 6 հիմնական դպրոցի նոր շենքի կառուցումը, այն համարելով Հայրենիք-Սփյուռք համագործակցության լավագույն դրսևորումներից:

Անդրադարձ կատարվեց ՌՀՄ և ՀՀԿ կողմից կազմակերպված «Եվրասիական տնտեսական միությանը Հայաստանի անդամակցության հեռանկարները» խորագիրը կրող համաժողովին և ներկայացվեցին կառույցի մոտեցումները Եվրասիական տնտեսական միությանն անդամակցության դեպքում Հայաստանի առջև բացվող հնարավորությունները:

Պայմանավորվածություն ձեռք բերվեց ՀՀ սփյուռքի նախարարության և ՌՀՄ, ՀՀԿ   հետագա համագործակցության խնդիրների շուրջ:

ՀՀ սփյուռքի նախարարությունը և Ռուսաստանի հայերի միությունն ու Համաշխարհային հայկական կոնգրեսը վերջերս կնքել են Համագործակցության հուշագիր: