Ազեուափայլ

Տիկին Հրանոյշ Յակոբեան Նախարար

ՀՀ Սփիւռքի նախարարութեան Երեւան

Սիրելի Տիկին Հ. Յակոբեան,

Խոր ցաւով իմացանք «Հայերն Այսօր» էլեկտրոնային թերթի գլխաւոր խմբագրին՝  Հայկ Կարապետեանի վաղահաս մահուան լուրը: Միութիւնս խորապէս կը ցաւի այս կորուստին համար եւ կը յայտնէ իր ցաւակցութիւնները ընտանեկան պարագաներուն եւ Ձեզի:

2010 թուականէն սկսեալ իրեն վստահուած այս խմբագրական աշխատանքը ան կը տանէր ամենայն բծախնդրութեամբ ու պատասխանատուութեան գիտակցութեամբ: Դառնալ խօսափողը տարբեր մշակոյթներու եւ քաղաքական ազգային թէ միջազգային ազդեցութեանց մէջ գործող բազմահարիւր համայնքներու, դիւրին չէ անշուշտ: Ան գիտցաւ պահել արդար հաւասարակշռութիւն մը մանաւա’նդ ազգային մեր քաղաքական հոսանքներու միջեւ, պահելով լրատուութեան պարկեշտ հաւասարակշութիւն մը կայքէջին վրայ:

Անշուշտ, ան լաւապէս կը գիտակցէր հայրենիք-սփիւռք տասնամեակներու վրայ երկարող յարաբերութիւներուն, զորս Թէքէեան Մշակութային Միութեան մեր մասնաճիւղերը հայ սփիւռքի զանազան գաղթօճախներու մէջ ունեցան յօգուտ ազգապահպանման եւ հայրենի ժողովուրդին ու մտաւորականութեան հետ եղբայրական իրաւ կապերու:

Այս նոյն գիտակցութեամբ ալ Թէքէեան Մշակութային Միութիւնը կը շարունակէ գործել, մանաւա’նդ, անցնող հնգամեակին, առաւել եւս հասունցած, հաւատալով որ Սփիւռքի նախարարութեան վստահուած է կարեւոր առաքելութիւն մը:

Ողբացեալ Հայկ Կարապետեանի կորուստը մեր ալ կորուստն է: Ան մնաց մի’շտ համեստ ու պատրաստակամ օգտակար ըլլալու հայ լրագրողին ու հայ մամուլին:

Յարգանքներով,

ԹԷՔԷԵԱՆ ՄՇԱԿՈՒԹԱՅԻՆ ՄԻՈՒԹԵԱՆ ԿԵԴՐՈՆԱԿԱՆ ՎԱՐՉՈՒԹԵԱՆ