ՀՀ սփյուռքի նախարարության 2014թ. «Արի տուն» ծրագրի առաջին փուլի մասնակիցներից է Մոսկվայից   ժամանած  Դավիթ   Գևորգյանը, ով   աչքի  է  ընկնում  իր հետաքրքրասիրությամբ,  խելացի հարցադրումներով, իսկ  ընկերների  հետ  շփվելիս նկատելի էր նրա բարեկիրթ լինելը: Խոր-Վիրապ կատարած այցելության  ժամանակ  զրուցեցինք Դավիթի  հետ:

-Դավի՛թ,  պատմի´ր  քո  մասին:

–Չնայած ծնվել եմ Երևանում, բայց ընտանիքով արդեն երկար տարիներ է, ինչ տեղախոխվել ենք ապրելու Մոսկվայում: Դեռևս սովորում եմ տեղի ռուսական դպրոցում՝ գերազանց առաջադիմությամբ: Հաճախում եմ նաև քինգ-բոքսինգի, լողի և ֆուտբոլի պարապունքների:

-Կասե՞ս մեզ` ինչ ես անում Մոսկվայում, որպեսզի պահպահես հայկական արմատներդ:

-Ինձ համար էլ կարևոր հարց է դա: Ասեմ, որ ռուսական միջավայրում գտնվելով հանդերձ` միշտ փորձում եմ խոսել հայերեն, որպեսզի չմոռանամ իմ լեզուն: Հարազատներիս, ընկերներիս ևս, ովքեր դժվարանում են խոսել հայերեն, սովորեցնում եմ: Մոսկվայում գործում են նաև հայկական դասերի խմբակներ, որտեղ մասնակցում ենք դասընթացներին: Կան նաև երգի-պարի խմբակներ: Այս միջոցով ամեն ինչ անում ենք, որ մեր հայի արյունը չկորցնենք:

-Իսկ  ինչպե՞ս  որոշեցիր մասնակցել  «Արի տուն» ծրագրին:

-Բարեկամներիցս  մեկը պատմեց  ծրագրի մասին, ով անցած տարի մասնակցել էր և շատ  գոհ էր  մնացել: Ես էլ հետաքրքրվեցի ծրագրով և որոշեցի մասնակցել:

«Արի տուն» ծրագրին մասնակցելու համար նույնիսկ Բրազիլիա գնալուց հրաժարվեցի, ուր պետք է մեկնեի՝ դիտելու համար ֆուտբոլի աշխարհի առաջնության խաղերը: Եվ հիմա չեմ փոշմանել ընտրությանս համար:

-Ինչպե՞ս են անցնում շրջագայությունները Հայրենիքում:   

-Շատ լավ և հագեցած են անցնում օրերս: Ինձ հատկապես ուրախացրեց հայոց լեզվի և  գրականության կազմակերպված դասընթացները, որոնց հաճույքով եմ մասնակցում: Թեմաներ կային,  որոնք մոռացել էի, իսկ հիմա հնարավորություն ունեմ վերհիշելու դրանք: Մեզ մոտ էլ միշտ կարդում եմ հայոց պատմությանը, հայ գրականությանը վերաբերող գրքեր: Իսկ այցելելով տարբեր պատմամշակութային վայրեր՝ հայրենիքիս հանդեպ կարոտն եմ առնում: Հասցրել եմ նաև լավ ընկերներ ձեռք բերել, միմյանց հետ խոսում ենք մեր երկրների բարքերի մասին, մեր առօրյայից: Խոստացել ենք  ծրագրի ավարտից հետո կապը չխզել, այլ ընդհակառակը՝ ավելի ամրապնդել:

-Իսկ  հետագայում  ի՞նչ  նպատակներ  ունես:

– «Արի տուն» ծրագրին մասնակցելուց հետո Մոսկվա վերադառնալով՝ մեկ շաբաթ անց մեկնելու եմ Լոնդոն, որպեսզի այնտեղ սովորելով` ավելի խորացնեմ անգլերեն լեզվի իմացությունս:

Զրուցեց   Գևորգ Չիչյանը