Հիւսէյն Եավուզտէմիր, որ Հրանդ Տինքի սպանութեան տարիներուն Տրապիզոնի կուսակալ էր, յայտնած է, որ ո՛չ Ապահովութեան տնօրէնութեան եւ ո՛չ ալ Ոստիկանութեան կողմէ իրեն տեղեկութիւն տրուած Հ. Տինքի դէմ կազմակերպուող սպանութեան առընչութեամբ: Եավուզտէմիր յայտնած է, որ եթէ իրեն դոյզն-ինչ նշան մը տրուած ըլլար, ինք կը կանխէր այդ սպանութիւնը: “Պոլսոյ կուսակալին անձնական նամակ մը կը գրէի եւ կը խնդրէի որ ան անհրաժեշտ միջոցներուն դիմէր: Այն ատեն Պոլսոյ կուսակալը կը ստիպուէր կանխել դէպքը”,- ըսած է ենթական՝ շարունակելով. “Քանի որ որեւէ տեղեկութիւն չտրուեցաւ ինծի, կը խորհիմ թէ այս գործին ետին պետութեան մէջ պետութիւն հանդիսացող կազմակերպութիւնը կայ: Եթէ պետութեան կուսակալէն կարգ մը բաներ կը պահուին, կը նշանակէ որ շատ վտանգաւոր կացութիւն եւ յետին նպատակ կայ այս գործին մէջ: Ուստի պէտք է այս դէպքերը Հանրապետութեան դատախազներուն կողմէ պրպտումի նիւթ դառնան”:

Իր այս մտածումներու հիման վրայ, Եավուզտէմիր շեշտած է, որ պետութեան մէջ ներթափանցած եւ պետութեան համազօր իրաւասութիւններով գործող ուժերը չէզոքացնել դիւրին չէ: Այդ ուժերը չէզոքացնելու համար երկար ժամանակ հարկ է: Առաջին առթիւ, պէտք է պաշտօնազրկել բարձրագոյն դիրքերու վրայ բոյն դրած պատասխանատուները: Պէտք է ձեռք անցընել այդ խմբակներու տրամադրութեան տակ գտնուող եւ սպառնալիքի նիւթ ծառայող փաստաթուղթերը: Որովհետեւ պաշտօնազրկուող անձեր երբ պաշտօնէ հեռացուին, կրնան իրենց հետ տանիլ կարգ մը փաստաթուղթեր եւ յետագային զանոնք գործածել մութ նպատակներու համար:

«Նոր Յառաջ»