Գաֆէսճեան արվեստի կենտրոնում այսօր՝ փետրվարի 5-ին, կկայանա հայ դասական երաժշտության համերգ՝ նվիրված Կիլիկիո թագավորության հռչակման օրվան:

Արվեստի կենտրոնից հայտնել են, որ ելույթ են ունենալու Հասմիկ Բաղդասարյանը (վոկալ), Ջուլիետա Վարդանյանը (դաշնամուր), Լուսինե Հարությունյանը (ջութակ), Յանա Դարյան (ալտ), Արամ Թալալյանը (թավջութակ): Ծրագրում հնչելու է՝ Շնորհալի, Կոմիտաս, Ա. Այվազյան, Ա. Խաչատրյան, Տ. Մանսուրյան, Ս. Զակարյան:

Կիլիկիան Հայաստանի պատմությունը հայկական բազմադարյան պատմության բովանադակալից մի ժամանակշրջան է՝ լի պատմական դեպքերով: Իր բուն հայրենիքից հեռու` Միջերկրական ծովի հյուսիս արեւելյան շրջանում, մեր ժողովուրդը կարողացավ ստեղծել մի թագավորություն, որը գոյություն ունեցավ երկու հարյուրամյակից ավելի եւ իր կարեւոր դերն ունեցավ տարածաշրջանում հարաբերությունների կարգավորման, մշակույթային եւ տնտեսական զարգացման գործում:

Կիլիկյան Հայաստանի թագավորության շրջանում մշակույթը բուռն զարգացում է ապրել: Կիլիկիայի մշակույթը զարգացել է բուն Հայաստանի հետ փոխադարձ ու սերտ կապերի մեջ, հայ բազմադարյան մշակույթի ավանդույթների հիման վրա:

Հայտնի ռուս պատմաբան Վալերի Բրյուսովը իր աշխատությունների մեկում նկարագրում է Կիլիկյան Հայաստանը, որպես «մարդկության հոգեւոր կյանքի համաշխարհային կենտրոններից մեկը»:

«Հայաստանը՝ միջնադարի երկրորդ կեսին կարողացավ Արեւելքում ստեղծել իրական մշակույթի բնօրրան, որը կարողանում էր միայնակ մարտնչել ողջ Ասիայի հետ»,- գրել է նա:

Կիլիկիայում էին գործում ժամանակի հայտնի հայ արվեստագետներ, օրինակ հայտնի մանրանկարիչ Թորոս Ռոսլինը:

Կերպարվեստը բարձր զարգացման է հասել Կիլիկյան Հայաստանում, մասնավորապես մանրանկարչությունը։ Հատկապես մեծ համբավ ուներ այսպես կոչված «Կիլիկիայի Մանրանկարչության դպրոցը»։

Այդ դպրոցի սաներից էր աշխարհահռչակ մանրանկարիչ Թորոս Ռոսլինը, նշանավոր նկարիչներից են Կոստանդինը, Գրիգոր Մլիճեցին, Կիրակոսը։

http://news.am/