Հունվարի 13-ը տոնական էր Ֆրանսիայի Թուլուզ քաղաքի հայ համայնքի համար: Օրն իր շուրջն էր համախմբել հայկական ընկերակցության անդամներին և նրանց բարեկամներին: Տոնական միջոցառումը սկսվեց Հիսուս Քրիստոսի Սուրբ Ծննդյան և Փրկչական Աստվածահայտնության տոնի առթիվ Սուրբ Ծննդյան պատարագով, որը մատուցվեց  Sainte-Claire եկեղեցում Մարսելի հայ առաքելական եկեղեցու քահանա Տրդատ Բազիկյանի կողմից: Տոնը կրկնակի էր, քանզի այն համընկավ Քրիստոսի անվանակոչության տոնի հետ:

Ինչպես «Հայերն այսօր»-ին հայտնում է  Թուլուզի հայ ընկերակցության վարչական խորհրդի անդամ Տաթև Գևորգյանը, տոնակատարությունը շարունակվեց հանդիսությունների սրահում ջերմ  և հաճելի մթնոլորտում: Այս ամենը «համեմված» էր հայկական ավանդական ուտեստներով՝ պատրաստված համայնքի մասնակիցների կողմից:

Թուլուզում արդեն 13 տարի ի վեր գործող հայկական մեկօրյա դպրոցի սաները ներկայացրեցին մի փոքրիկ հատված Հին Կտակարանից: Ամանորի հրաշքին սպասող փոքրիկները տոնական երգ ու պարով դիմավորեցին Ձմեռ Պապին:

Միջոցառմանը ներկաները հնարավորություն են ունեցել վայելելու համայնքում գործող պարային խմբի գեղեցիկ, հայկական ժողովրդական պարային համարները:

Օրն ավարտվեց  հայկական շուրջպարով, որին սիրով միացան նաև ֆրասիացի հյուրերը: