«Արցախպրես»-ի  թղթակցի   հետ  զրույցում   Ստեփանակերտի  փոխքաղաքապետ   Արմեն  Հակոբյանն  ասել է, որ     հանդիպմանը  Ս.  Գրիգորյանը  ներկայացրել  է   մայրաքաղաքի առօրյան, բնակչության խնդիրները  և  դրանց   լուծման   ուղիները:

Ըստ    Ա.  Հակոբյանի՝   քաղաքապետը  որոշ  մանրամասներ է հաղորդել պատերազմի արհավիրքների վերացման ուղղությամբ  համայն հայության կողմից ցուցաբերած հսկայական աջակցության, երկրի իշխանությունների միջամտությամբ ավերված քաղաքի վերականգման ու բարեկարգման շինարարական մեծածավալ աշխատանքների վերաբերյալ:

«Մենք հյուրերին   ասել  ենք, որ   Ստեփանակերտն    օրեցօր գեղեցկանում,  բարգավաճում  և զարգանում   է: Արցախ ժամանած հյուրերը երկրի մասին առաջին տպավորությունը ստանում են Ստեփանակերտից»,-նշել  է  փոխքաղաքապետը:

Ըստ  մեր  զրուցակցի՝  Գլենդելի քաղաքապետ  Զարեհ Սինանյանը պատվիրակության անունից շնորհակալություն է հայտնել Սուրեն Գրիգորյանին` ջերմ ընդունելության համար և վստահեցրել, որ ներկա այցով արդեն ուրագծվում են հետագա  համագործակցության  ուղիները:

«Զ. Սինանյանը   կարևորել է Հայաստան-Արցախ-Սփյուռք  շփումները և պատրաստակամություն հայտնել որևէ օգտակար գործ ձեռնարկել մայրաքաղաք Ստեփանակերտի համար: Ինքն  առաջին անգամ Արցախում եղել է պատերազմի ծանր տարիներին, երբ ռմբակոծվում, հրետակոծվում էին Շուշին, Ստեփանակերտը, հայկական մյուս բնակավայրերը:   Այժմ   զարմացել  է   տեսնելով  Ստեփանակերտն  այսքան     շեն  ու   ծաղկուն, իսկ  բնակիչները՝  ուրախ»,-ավելացրել  է Ա.  Հակոբյանը:

Հանդիպմանը  ներկա  էին նաև  ԱՄՆ Կալիֆորնիա նահանգի սենատոր Էնթոնի Պորտանտինոն, ԱՄՆ-ում Արցախի Հանրապետության մշտական ներկայացուցիչ Ռոբերտ Ավետիսյանը  և  այլք: