Ուկրաինայի Զապորոժիե քաղաքում անցկացվում է Անատոլի Երմակի անվան 22-րդ միջազգային ռազմական եւ ավանդական մշակույթների փառատոնը, որին աջակցում է Ուկրաինայի երիտասարդության եւ սպորտի նախարարությունը:

Ինչպես հաղորդում է AnalitikaUA.net-ը, Զապորոժիեի մարզի հայերի միությունը աջակցել է փառատոնի անցկացմանը, իսկ Մարիուպոլցի ըմբիշներ Տարոն Մակարյանը եւ Գենադի Կորխը հայկական կոխ ըմբշամարտը ներկայացրեցին բազմաթիվ ազգային մարտարվեստների շարքում:

Կայքը հիշեցնում է, որ օգոստոսի 17-19-ը Կիեւում կանցկացվի Անատոլի Երմակի անվան 22-րդ միջազգային փառատոնի վերջնական փուլը, որտեղ նույնպես կներկայացվի հայկական կոխ ըմբշամարտը:

Ինչպես հայտնի է, Ուկրաինայի հայերի միությունը հատուկ ուշադրություն է դարձնում Ուկրաինայում սպորտի և մարզիկների աջակցությանը: Մարզական տարբեր միջոցառումների ընթացքում տրվում են մրցանակներ Ուկրաինայի հայերի միության նախագահ Վիլեն Շատվորյանի կողմից։