Ստեփանակետի Հանրապետական բժշկական հիվանդանոցում ասվտրիահայ անոթաբան Արա Ուղուրլյանն մայիսի 16-18-ն իրականացնում է անվճար անոթային վիրահատություններ:

«Արցախպրես»-ի  թղթակցի  հետ զրույցում Արա Ուղուրլյանն ասել է, որ արդեն 3 տարի  է, ինչ ինքն  այցելում  է Ստեփանակերտ և  տեղի  մասնագետների  հետ  իրականացնում անոթային վիրահատություններ:

Նա նշել  է, որ իր նպատակն է արցախցի գործընկերների հետ առանց վիրահատական միջամտությունների իրականացնել խցանված  անոթների  բուժում: Այցի  ընթացքում նախատեսված է 16 վիրահատություն:

Մեր  զրուցակիցն  ասել է, որ արցախցի  մասնագետներն  արդեն   ինքնուրույն  կարողանում են     իրականացնել նման վիրահատություններ: «Մեր   հետազոտություններից պարզ  է  դարձել, որ տղամարդկանց  ավելի  քան  70 %-ի  մոտ առաջացած անոթների  խցանումները հիմնականում ծխելու  արդյունք են: Ծխախոտի  մեջ եղած նիկոտինը   քայքայում  և  բարակեցնում   է  անոթների  պատերը, որի  պատճառով  էլ    սկսում  է  աթերոսկլերոզ  և անոթների խցանում:  Անոթային   հիվանդությունները   հիմնականում  ի  հայտ  են  գալիս   40  տարեկանից  հետո»,-ասել  է    Ա. Ուղուրլյանը:

Հանրապետական  բժշկական  կենտրոնի  անգիոգրաֆիայի   բաժանմունքի    վարիչ Գևորգ  Ամիրջանյանն  էլ ասել է, որ  իրենց  բաժանմունքում  են իրականացվում  ստորին   վերջույթների զարկերակների  ինվազիվ  միջամտությունները:

Ըստ   նրա՝  Ա. Ուղուրլյանի  նախկին  2  այցն  իրենց  համար ավելի   շատ    ուսուցողական   նպատակ   էր   հետապնդում, իսկ  այս  անգամ արդեն  ավստրիահայ    բժշկի    հսկողությամբ իրենք    են  իրականացնում  անոթային   վիրահատություններ:

«Կարող  ենք  ասել, որ Արցախում    արդեն   լուծված  է  ստորին   վերջույթների զարկերակների  ինվազիվ  միջամտությունների   կատարումը, սակայն   կարող  են   լինել    բացառիկ     դեպքեր, երբ    կարիք  կլինի  փորձառու  մասնագետների օգնությունը»,-նշել  է   Գ. Ամիրջանյանը:

Հիվանդանոցում  ունեցած  անգիոգրաֆ  սարքի  միջոցով իրականացվում են ոչ  միայն   սրտի  կորոնար  զարկերակների    միջամտություններ,  այլև տարբեր տեսակի պերիֆերիայի (ծայրամասային)  և այլ վիրահատություններ:

Անգիոգրաֆիայի  բաժանմունքի վարիչի   խոսքով՝  խնդիրն այստեղ ոչ այնքան սարքերն ու գործիքներն  են, որքան  հիվանդների ճիշտ ախտորոշումը՝  պարզելու  համար  թե  որ  հիվանդին  է անհրաժեշտ ինտերվենցիոն  կամ բաց  վիրահատությունների  միջամտություն,  և  որին դեղորայքային բուժում: