«Հայաստանի մշակութային օրեր» միջոցառումների շրջանակում նոյեմբերի 22-ին Մոսկվայի նկարիչների տանը «Հայկական հոգու ձայնը» խորագրով համերգային ծրագրում կմիավորվեն հայկական դուդուկն ու ջազը:Մշակույթի նախարարության մամուլի ծառայությունից տեղեկացնում են, որ համատեղ ելույթով հանդես կգան դուդուկի անվանի վարպետներ Ջիվան Գասպարյանը, Գևորգ Դաբաղյանը, Վահագն Հայրապետյանի ջազ կվինտետը, հայտնի այլ երաժիշտներ:

«Ներկայացնելու ենք Կոմիտաս, Սայաթ Նովա, ժողովրդական ստեղծագործություններ: Ռուսաստանի հանդիսատեսի հետ մեր շփումն , իհարկե, առաջինը չէ: Ռուսները յուրահատուկ վերաբերմունք ունեն դուդուկի հանդեպ։ Մեր համերգներն այստեղ անցնում են լեփ-լեցուն դահլիճներում. հանդիսատեսը շունչը պահած լսում է դուդուկի երաժշտությունը: Համոզվածեմ, որ նույն մթնոլորտը կտիրի նաև Մոսկվայի համերգին»,-աղբյուրի փոխանցմամբ՝ ասել է ՀՀ ժողովրդական արտիստ Գևորգ Դաբաղյանը:

Գևորգ Դաբաղյանի խոսքով, դուդուկի ընկալումն իտալացիների կողմից բոլորովին այլ «պատմություն» է, խիստ ինքնատիպ: Հայկական գործիքի հանդեպ Ռուսաստանում և Իտալիայում հանդիսատեսի մոտեցումն ու ընկալումները տարբեր են, բայց բոլոր «թելերն», ի վերջո, գնում և միավորվում են տիեզերական մեկ ընդհանուր սիրո մեջ: Սեր, որը ծնվում է հայկական ծիրանափողից: